DILI, 02 dezembru 2021 (TATOLI)– Governu liu hosi Sekretaria Estadu Juventude no Desportu (SEJD), aloka orsamentu $25.000 ba Sentru Treinamentu Futeból Juveníl Timor-Leste (STFJTL) hodi realiza Kompetisaun Nasionál Futeból Juveníl 2021.
“Lori Governu nia naran abertura eventu juveníl cup tinan 2021. Tanba kompromisu SEJD nian mak serbisu makas oinsá autonomiza jestaun ba sentru futeból sira iha Timor laran tomak,” Sekretáriu Estadu Juventude no Desportu, Abrão Saldanha, hateten hafoin abertura Jjogu futeból juveníl iha Estádiu Munisipál Dili, kinta ne’e.
SEJD hamutuk ho Federasaun Futeból Timor Leste (FFTL) sei asina akordu atu dezenvolve grassroot ba atividade juveníl ho asisténsia hosi Koreia atubele dezenvolve atleta no infraestrutura ne’ebé hala’o iha Becora.
Jogu juveníl 2021 ne’e ho tema “Ami nia talentu mak Timor-Leste nia Orgullu, hamutuk ita dezenvolve futeból Timor-Leste”.
Atividade ne’e fó biban ba STFJTL hosi munisípiu Dili, Lautém, Baucau, Bobonaro, Ermera, Liquiça no Covalima hodi tuir festivál futeból juveníl sub 121-14 no sub-16.
Abertura ba eventu ne’e, hahú ho entrega taxa rotativa hosi CTFJTL munisípiu Lautém ba STFJTL nasionál nuudar komisaun organizadora, nune’e jogu ne’e ohin (02/12) to’o 06 dezembru 2021.
Notísia Relevante: Bobonaro realiza jogu futeból juveníl époka 2021
Jornalista : Hortencio Sanchez
Editór : Florencio Miranda Ximenes
