VIQUEQUE, 02 dezembru 2021 (TATOLI)—Sentru saúde postu Viqueque villa rejista kazu moras Infesaun Respiratóriu Alta (IRA) a’as hamutuk 8.610, iha fulan-janeiru to’o novembru.
“Ita rejista moras IRA a’as tanba ema hadi’a dalan halo rai-rahun maka’as, tempu udan duni maibé bainhira udan para, dalan ninin nakonu ho rai-rahun fali. Ho ida-ne’e maka komunidade hetan moras respiratóriu aguda ne’e,” Xefe sentru saúde postu Viqueque villa, Celestina da Costa Alves, informa ba Agência TATOLI, iha internamentu, Beloi, sentru saúde Viqueque villa, munisípiu Viqueque, kinta ne’e.
Notísia relevante: Janeiru-maiu, Sentru Saúde Viqueque Vila rejista pasiente IRA 3.777
Enkuantu, moras seluk ne’ebé rejista iha postu saúde Viqueque ho númeru moras ladun boot kompara ho IRA.
“Hosi fulan-janeiru to’o novembru, rejista moras hanesan kulit hamutuk 101, diarea iha kazu 4.156, pneumoia 757, Scabies 756, diareia ho ran kazu 85 no asidente tráfiku kazu hamutuk 64,” nia akresenta.
Jornalista : Vitorino Lopes da Costa
Editora : Julia Chatarina
