DILI, 02 dezembru 2021 (TATOLI)— Tuir dadus hosi Ministériu Saúde, hahú hosi 27 outubru to’o 02 dezembru, hatudu sidadaun ho idade 12 no idade menus hosi 18 ne’ebé simu ona vasina Pfizer doze dahuluk atinje ona 18,7%, ne’ebé ekivalente ho 34.031.
“Totál populasaun ne’ebé simu ona vasina Pfizer hamutuk 50,218, kompostu hosi doze dahuluk hamutuk ema 34,031 ho 18,7%. Enkuantu vasina doze daruak 8,9% ne’ebé ekivalente ho ema 16,187,” Diretora Servisu Saúde Munisípiu Dili, Agostinha Segurado, informa ba jornalista sira iha salaun MSSI, Caicoli, kinta ne’e.
Tuir nian, hosi totál 50,218 ne’e, programa imunizasaun ba eskola hamutuk 149 iha munisípiu Dili konsege atinje doze dahuluk 85% no doze daruak 22%.
“Hosi númeru estudante ne’ebé simu doze dahuluk 34.031 ne’e kobre ba eskola 135 iha postu adminitrativu lima iha Dili, maibé la inklui postu Atauru ho eskola hamutuk 14,” nia akresenta
Servisu Saúde Munisípiu Dili hasoru hela difikuldade atu transporte vasina Pfizer ba iha postu Atauro. Nune’e’, ekipa saúde hahú prepara atu trasporta vasina iha semana oin atu estudante iha eskola 14 bele asesu, molok feriadu.
MS mós aviza ona inan-aman sira atu akompaña labarik idade 12 to’o 17 ne’ebé la eskola ba tuir programa vasinasaun iha Hospitál Nasionál Guido Valadares (HNGV).
Daudaun, MS liuhosi Servisu Saúde Munisípiu Dili mós halo sensibilizasaun ba komunidade sira atu lori labarik sira ne’ebé la eskola ba asesu vasina iha sentru saúde ne’ebé besik no HNGV.
Timor-Leste rejista totál kazu konfirmadu pozitivu Covid-19 ba labarik sira tinan 18 mai kraik na’in-3.661 (19%) no óbitu na’in-13 (11%).
Jornalista : Felicidade Ximenes
Editór : Florencio Miranda Ximenes
