COVALIMA, 03 dezembru 2021 (TATOLI)—Autoridade Nasionàl Petróleu no Minerál (ANPM), sensibiliza lei kódigu mineiru importante atu jere no regula riku-soin iha Timor-Leste ba komunidade iha Covalima.
“Lei kódigu Mineiru númeru 12/2021, 30 juñu, iha lian Indonésia ema bolu undang undang pertambangan ou lei inan ba ita-nia atividade mineiru ni’an durante ne’e, ita laiha lei ida mak sai lei inan hanesan baze ba atividade tomak mineiru ni’an. Entaun, ita seidauk halo esplorasaun mineiru sira seluk,” Prezidente ANPM Florentino Ferreira Soares, hateten ba jornalista iha salaun Administrasaun Covalima, sesta ne’e
Ho lei kodigu mineiru ajuda atu favorese oinsá bele explora minerál sira seluk hanesan mineral sira-nia matéria prima mai hosi besi, osan-mean, maganeza no mós mina-rai, naun metaniku hanesan fatuk kalkariu, fatuk mármore sira ne’ebè iha valor boot.
“Ita bele merkadoriza hosi fó reseita ba Estadu. Ita fahe enkudtamentu legal sira-ne’ebè mak liga ho atividade sira tomak lisensa protesaun, estudu, protesaun meiu ambiente, konteudu lokál, protesaun ba rai nomós área protezida hotu,” nia hateten.
Reprezentante administradó Munisípiu Covalima, Francisco Mendonça da Costa, reforsa sensibilizasaun lei kódigu mineiru partisipante sira hanesan atu lori mensajen, hodi hato’o ba komunidade joven no estudante sira maka futuru ba nasaun.
“Ha’u hakarak dehan partidipasaun ita hotu nian iha ne’e, ita sai mensajeiru atu kontinua fahe tutan informasaun ba ita-nia komunidade,” nia dehan.
Diseminasaun lei ida ne’e importante tebes no ninia esperansa ba komunidade ba perfurasaun mina bele fo reseita ba Estadu aleinde mós iha riku-soin sira seluk.
Sensibilizasaun be mehi ne’e, partisipa hosi autoridade lokal xefi suku, sosiedade sivil, veteranu no joven sira iha Covalima.
Jornalista:Celestina Teles
Editor : Cancio Ximenes
