HEADLINE, LIQUIÇÁ, MUNISÍPIU

MAPKOMS lansa ‘Naroman ba Suku’ inklui sentru informasaun iha Lisadila

MAPKOMS lansa ‘Naroman ba Suku’ inklui sentru informasaun iha Lisadila

Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, asina plaka programa ‘Naroman ba Suku’, iha iha suku Lisadila, sesta (03/12). Imajen TATOLI/Jogerjo Guterres

LIQUIÇÁ, 03 dezembru 2021 (TATOLI)—VIII Governu Konstitusionál liuhosi Ministériu Asuntu Parlamentár no Komunikasaun Sosiál (MAPKOMS), iha sesta ne’e, lansa programa ‘Naroman ba Suku’ inklui inaugura sentru informasaun iha suku Lisadila, postu administrativu Maubara, munisípiu Liquiçá.

Objetivu harii sentru informasaun ne’e atu kapasita joven sira tuir formasaun iha área jornalizmu, nune’e sira bele divulga informasaun ne’ebé akontese iha suku.

Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo. Imajen TATOLI/Jogerjo Guterres

“Programa Naroman ba Suku foin hahú iha suku 10 iha territóriu Timór, nune’e bele mobiliza joven sira iha suku atubele sai transformadór informasaun kona-ba potensialidade suku hodi hato’o ba nível Governu sentrál hodi hatene,” Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, hateten, iha ámbitu seremónia iha suku Lisadila.

Notísia relevante: Suku Fuat no Seloi karaik sai benefisiáriu Naroman ba Suku

Tuir governante ne’e, suku Lisadila iha área potensialidade barak, liuliu agrikultura, pekuária no seluk tán, maibé ema barak lahatene, tanba laiha meiu atu divulga informasaun.

Iha inisiál, joven hamutuk 10 iha suku ne’e sei hetan formasaun iha área jornalizmu, nune’e bele destaka iha sentru informasaun hodi fó sai informasaun.

“Sentru informasaun sei sai mós sentru biblioteka, atu nune’e ema ne’ebé hakarak hetan informasaun ruma bele mai asesu iha sentru ne’e hodi hatene informasaun liuliu atividade Governu,” Ministru akresenta.

Iha biban ne’e, membru ezekutivu ne’e klarifika programa Naroman ba Suku la’ós atu lori enerjia eletrisidade mai komunidade nia le’et hanesan ema balun nia hanoin, maibé atu fó informasaun, nune’e bele hetan naroman liuhosi sentru informasaun.

Nune’e, MAPKOMS husu ba komunidade suku Lisadila atu kuidadu didi’ak ekipamentu sira ne’ebé koloka iha sentru ne’e hodi bele uza ba tinan naruk.

Xefe suku Lisadila, Fernando Lobo. Imajen TATOLI/Jogerjo Guterres

Iha biban hanesan, Xefe suku Lisadila, Fernando Lobo, apresia no orgullu tanba Governu bele hili ona suku ne’e implementa programa inklui instala fasilidade.

“Ha’u kontente tanba bele hili ami-nia suku ho fasilidade kompletu. Espera katak hosi sentru ne’e bele kapasita di’ak liután joven iha suku,” autoridade lokál ne’e akresenta.

Governu hahú introdúz programa Naroman ba Suku iha tinan 2019 no programa ne’e implementa ona iha suku 10 iha munisípiu Ermera, Lautém, Viqueque, Liquiçá, Bobonaro, Manufahi, Aileu, Covalima no Ainaro.

Durante tinan 2019 to’o 2020, Governu implementa ona programa ne’e iha suku tolu lokalizadu iha parte leste, hanesan Hae-coni iha postu administrativu Baguia, munisípiu Baucau, suku Muapetine no Lore II iha munisípiu Lautém, parte sul iha suku Liurai, munisípiu Aileu no suku Rotuto, iha munisípiu Manufahi, enkuantu parte oeste iha suku Leo-hitu no Soelesu iha munisípiu Bobonaro no suku Batumanu, postu administrativu Atsabe, munisípiu Ermera.

Enkuantu, iha tinan 2021, tuir planu programa ne’e sei implementa tan iha suku haat tuir kapasidade no rekursu ministériu implementadór programa.

Ba kada suku ne’ebé sai benefisiáriu, Governu fó apoiu orsamentu maizumenus $10.000 liuhosi transferénsia públika, hodi harii sentru informasaun ba komunidade hodi implementa programa.

Programa Naroman ba Suku nu’udar programa pilotu hosi VIII Governu Konstitusionál, ho objetivu haat mak hanesan promove asesu ba informasaun iha suku rurál no hakbiit komunidade sira-nia kapasidade asesu ba informasaun.

Programa ne’e buka atu lori informasaun ba nível lokál besik ba komunidade sira iha suku hodi fó dalan ba komunidade atu hato’o sira-nia preokupasaun ka obstákulu sira ne’ebé mak sira hasoru hodi aprezenta ba meiu komunikasaun nasionál sira.

Jornalista : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!