DILI, 03 dezembru 2021 (TATOLI)–Ministériu Ensinu Superiór Siénsia no Kultura (MESSK) planeia iha tinan 2022 sei loke tan vaga 1.000 ba estudante kbiit laek sira iha territóriu nasionál, atu kompete iha programa rejime bolsa hakbiit hodi asesu ba ensinu superiór.
Ministru Ensinu Superiór Siénsia no Kultura, Longuinhos dos Santos, relata, totál vaga ba rejime bolsa hakbiit ne’ebé ministériu planeia ona tenke atinje 3.000 iha tinan-tolu nia laran, nune’e iha balansu entre família ho ekonomia sufisiente no mínimu hetan oportunidade hanesan.
“Tinan ne’e ita hahú ona ho benefisiáriu bolsa hakbiit 910, tinan oin ita hakarak kontinua tan ho 1.000,” Ministru informa iha Parlamentu Nasionál (PN), sesta ne’e.
Notísia relevante: FDCH ho IESPP-sira asina MoU apoia bolsa hakbiit ba benefisiáriu 910
Nune’e, ministériu sei loke tan vaga 1.090 iha tinan 2023 ba estudante kbiit laek, nune’e bele atinje meta.
“Rejime bolsa hakbiit ne’e programa foun ne’ebé MESSK kria iha tinan 2021, ne’ebé loke oportunidade estudante sira ne’ebé ho família laiha forsa atu apoiu fundu ba oan sira atu kontinua ba universidade,” governante ne’e esplika.
Tanba ne’e, MESSK ho polítika ne’ebé iha, integra programa rejime bolsa hakbiit ne’e hamutuk ho rejime jerál no rejime oportunidade atu estabelese hamutuk hodi sai pakote ida no anunsia rezultadu hamutuk.
Jornalista : Tomé Amado
Editora : Julia Chatarina
