VIQUEQUE, 04 dezembru 2021 (TATOLI) – Komisaun Nasionál Eleisaun (CNE, sigla portugés) liuhosi Komisáriu Olávio da Costa Monteiro Almeida, hateten, sidadaun tenke koñese kl’ean prosesu eleisaun ne’ebé la’o iha nasaun ida-ne’e.
“Ami kontinua hala’o edukasaun sívika ba estudante atu estudante sira hanesan eleitór foun hodi koñese prosesu eleisaun iha ita-nia nasaun. Tanba ne’e, ami tún ba eskola sira iha Viqueque hodi halo edukasaun sívika.” Komisáriu Olavio da Costa Monteiro Almeda, informa ba Agência Tatoli, hafoin remata abertura edukasaun sívika, iha Ensinu Sekundária Calixa Viqueque, sábadu ne’e.
Olávio hatutan, prezensa CNE iha eskola Calixa atu partilla informasaun prosesu resensiamentu eleitorál ba estudante sira nune’e ezerse diretu iha eleisaun prezidensiál 2022.
Objetivu hosi edukasaun sívika ne’e atu autoridade, juventude no estudante sira koñese kle’an prosesu eleisaun nian. Edukasaun sívika ne’e ho tema “promove esklaresimentu kona-ba aktu eletóral no eleisaun ne’ebé reziliente ho Covid-19.”
“Ita la haree ba situasaun tanba situasaun la prevee iha ita-nia konstituisaun. Iha ita-nia konstituisaun artigu 65, eleisaun periódiku kada tinan lima, ita tenke realiza eleisaun ba prezidensiál no parlamentár,” nia hateten.
Komisáriu CNE ne’e husu estudante sira ho pasiensia hodi rona informasaun sira-ne’ebé ekipa CNE no Sekretariadu Tékniku Adiministrasaun Eletorál (STAE) partilla kona-ba prosesu eleisaun no resensiamentu eletorál.
Iha fatin hanesan,diretór ESG Calixa, Rozito Soares do Rosário, agradese ba CNE no STAE ne’ebé partilla ona informasaun eleisaun nian ba estudante sira, atubele komprende prosesu eleisaun sira-ne’ebé realiza iha Timor-Leste.
Bidan ne’e, Diretór STAE Munisípiu Viqueque, Humberto Fernandes, husu estudante Calixa ne’ebé idade 17 seidauk iha eletiorál hakbesik-an ba edifísiu STAE iha munisípiu hodi trata kartaun eletorál.
Entretantu partisipante ne’ebé partisipa iha edukasaun sívika ne’e hamutuk na’in-120.
Jornalista : Vitorino Lopes da Costa
Editór : Evaristo Martins
