BOBONARO, 06 dezembru 2021 (TATOLI) – Komandu FALINTIL-Forsa Defeza Timor-Leste (F-FDTL), segunda ne’e halo abertura ezersísiu Cobra 21-2 ne’ebé sei realiza iha postu administrativu Atabae, munisípiu Bobonaro nune’e familiariza forsa iha terrenu.
Ezersísiu abertura Xefe Estadu Maiór F-FDTL,Tenente Jenerál Lere Anan Timur, estrutura komandu ezersísiu Cobra, komponente Terrestre, pelotaun ida hosi forsa Navál Lijeira, kompañia ida hosi Komponente Apoiu Servisu (CAS, sigla portugés), pelotaun ida hosi Polísia Militár (PM) no ekipa ida hosi Unidade FALINTIL.
Ezersísiu Cobra 21-2 ne’e nu’udar planu anuál komandu F-FDTL nian ho objetivu atu hala’o planeamentu iha nível postu no prátika iha postu tátika, atu kapasita forsa sira oinsá atu hatene komanda hodi kumpri misaun nu’udar luta nasaun no devér atu bele sai militár ne’ebé di’ak.
Nune’e mós parte ida atu prepara membru sira-nia mentalidade partisipa iha formasaun sira iha rai-li’ur ne’ebé sempre fo konvite mai F-FDTL atu fahe esperiénsia ba malu iha área defeza nian.
Tenente Jenerál Lere Anan Timur, hateten forsa iha devér obrigasaun atu partisipa iha ezersísiu no formasaun militár nune’e bainhira akontese funu ruma bele uza tátiku militár hodi oho inimigu atu asegura soberania nasaun no proteje povu hosi ameasa.
“Ezersísiu ida-ne’e atu familiariza terrenu, adapta no koñese rai tanba militár tenke domina rai Timór, oinsá hatene bee-matan iha-ne’ebé, ai-han iha-ne’ebé, rai-kuak iha ne’ebé, ita tenke hatene hotu,” Tenente Jenerál Lere ko’alia iha kampu Futeból, Maliana.
Nia dehan, militár tenke kaer-metin kompromisiu ida katak Timór-oan tenke fó nia vida kuandu povu presiza tanba ne’e tenke garante soberania estadu RDTL nian.
“Laiha ema ida mai hanorin funu ba Timór-oan sira, ita mak sei hanorin malu, ita sei la’o-tuir ho ita-nia esperiénsia rasik, maski ita lakohi ona atu funu maibé nudar militár ita tenke aprende duni funu hodi sai lutu ba nasaun no asegura soberania nasaun ita tenke preparadu agora,” Tenente Jenerál Lere enkoraja membru F-FDTL sira.
Ikusliu, Jenerál Lere dejeza susesu ba komandante no soldadu sira-ne’ebé partisipa iha ezersísiu ne’e atu nafatin aproveita hodi aprende didi’ak tátika militár no husu atu hatudu komportamentu di’ak ba komunidade sira iha Atabae nune’e bele hatudu rezultadu pozitivu hosi ezersísiu ne’e.
Durante semana rua, membru F-FDTL sira sei hala’o atividade hanesan, tiru-malu modelu ofensiva no defensiva uza bala simulár. Aividade ne’e sei ensera iha aldeia Damilaran, suku Aidabaleten, postu admimistrativu Atabae, munisípiu Bobonaro loron 16 dezembru, tinan ne’e.
Jornalista : Sérgio da Cruz
Editór : Evaristo Soares Martins
