COVALIMA 8 Dezembru 2021 – Prezidente Konselu Veteranu Munisípiu Covalima, Osório Soares ‘Mausoko’ husu ba intelektuál iha Covalima hametin unidade nasionál nune’e lori munisípiu ne’e ba oin.
“Joven sira tenke buka-hatene istória. Ami na’in hira iha-ne’e katuas hotu ona , ha’u hato’o ba maluk intekletuál sira iha Covalima tenke hametin unidade nune’e lori Covalima ba oin,” Prezidente Konselu Veteranu Covalima ne’e, ko’alia liuhosi diskursu bainhira parisipa serimónia lansamentu palaka muzeu rezisténsia memoriál iha Covalima, tersa kalan.
Nia haktuir, veteranu sira hahú luta desde 1975 to’o 1999 ho sofrimentu oinoin durante tinan 24 nia laran tanba ne’e intelektuál tenke hanoin oinsá partisipa iha prosesu dezenvolvimentu nasionál.
“Tanba ne’e ita-nia maluk sira iha Díli hemu tua, ita Covalima labele lanu, bele aprende maun boot sira-nia polítika nivel aas ne’e, maibé labele implementa iha estrada,” veteranu ne’e fó hanoin.
Ho nune’e hanesan joven intelektuál sira ko’alia buat loos ba populasaun no labele koalia buat ne’ebè laloos ba populasaun sira.
Nia husu intelektuál Covalima tenke fo liman ba malu hodi lori dezenvolvimentu iha Covalima la’o ba oin, tanba futuru nasaun iha foinsa’e sira-nia liman.
Jornalista : Celestina Teles
Editór : Evaristo Soares Martins
