LIQUIÇA, 10 dezembru 2021 (TATOLI) – Provedoria Direitu Umanu no Justisa (PDHJ), Sentru Estudu ba Pás no Dezenvolvimentu (CEPAD, sigla Portugés) no Komisaun Anti Korrupsaun (CAC) hamutuk ho parseiru internasionál sira, ohin, iha Munisípiu Liquiça, selebra loron internasionál ba direitu umanu.
Iha loron 10 dezembru 2020 nu’udar loron aniversáriu Deklarasaun Universal Direitu Umanu ba dala-73, nune’e PDHJ, CEPAD no CAC kada tinan selebra loron internasionál direitu umanu aliñadu ho tema espesífiku “Igualidade, hamenus dezigualdade no hakat ba oin ho Direitu Umanu”.
Iha biban ne’e, Komisáriu Komisaun Anti Korupsaun (KAK), Sergio Hornai, hateten, tempu ona atu valoriza no dignifika ema hotu nia direitu hanesan no labele fó oportunidade ba ema balun kontinua hakdasak iha kotuk.
“Ita nafatin tau importansia direitu umanu, igualdade ba buat hotu, labele halo diskriminasaun, labele fó oportunidade ba ema ida hela iha kotuk, ita tenke valoriza ema hotu nia direitu atu asesu ba direitu traballu, diretu ba justisa, direitu ba fó informasaun no livre halo sirkulasaun iha estadu ida ne’e,” Komsiáriu KAK ne’e, hateten, iha ámbitu selebrasaun loron direitu umanu.
Estadu tenke tane aas igualdade labele hamosu dezigualdade no tenke hakat ba oin hodi hametin koesaun ida ba direitu umanu ida ne’ebé forte iha Timor-Leste.
Tanba, iha okupasaun Indonézia fó lisaun boot ba povu Timor -Leste hodi luta ba libertasaun to’o hetan torturasaun barak hosi ema ka rai seluk ne’ebé viola povu sira nia direitu.
“Ita liberta nuudar hanesan nasaun, Estadu no povu ida ne’ebé livre presiza hakat ba ida ne’e, maibé iha mós responsabilidade boot hodi hatene, ita nia direitu no obrigasaun to’o iha ne’ebé, ita iha direitu, maibé la’ós absoluta, direitu ne’e relativu atubele iha respeita malu, nune’e bele hatur igualidade,” nia dehan.
Iha fatin hanesan, Diretór Ezekutivu CEPAD, João Boavida, iha loron 10 dezembru 1948, tinan 73 liubá, Asembleia Jerál Nasaun Unida (ONU) adopta deklarasaun universál direitu umanu ne’ebé haklaken nu’udar dokumentu xave ka padraun komún realizasaun direitu umanu ba ema hotu-hotu iha nasaun hotu ho finalidade ida katak ema ida-idak ka órgaun ida-idak iha sosiedade laran ka’er metin deklarasaun ne’e iha sira neon.
“Selebrasaun loron internasionál direitu umanu e’e atu fó hanoin ba ita Timór-oan tomak hosi kamada leten too tun mai kraik atu asaun hodi valoriza direitu umanu tanba konsagra ona iha konstituisaun katak ba ema hotu atu iha direitu ba moris di’ak,” nia fó hanoin.
Iha loron direitu umanu buat rua ne’ebé importante mak hanesan igualdade no inkluzaun ho signifika laiha diskriminasaun ba buat hotu no ema hotu.
“Ita hanesan nasaun ne’ebé foin mak hamriik maibé ita iha lei lubuk ida no konvensaun lubuk ida ona loloos ne’e atu fó atensaun liubá direitu sidadaun nian,” nia akresenta.
Adjunta PDHJ, Benícia Eriana Magno, hateten, selebrasaun loron ne’e importante tebes ba ema hotu atu goza nia direitu.
“ONU halo garante ema hotu nia direitu la haree ba kor oin-oin, relijiaun, lian no seluk tan tanba ema ida hanesan ba ema hotu,” Adjunta ne’e afirma.
PDHJ nia kompeténsia mak promove direitu umanus, liberdade no ba garantia fundamental sira ne’ebé hatuur iha artigu 27 Konstituisaun RDTL no tratadu Internasionál direitu umanu ne’ebé Estadu ratifika tiha ona.
“Tanba ne’e onra boot tebes ba família boot PDHJ hodi selebra loron importante ne’e ho parte relevante hotu no komunidade sira iha Suku Dato Postu Administrativu Liquiça Vila,” nia akresenta.
Entretantu, Administradór Munisipiu Liquiça, Pedro Paulo Gomes hateten, selebrasaun ba loron importante tebes ba ema hotu atu valoriza nafatin direitu umanu iha nasaun ne’e.
“Ha’u sente kontente no agardese tanba bele mai selebra loron importante ne’e iha Liquiça atu dignifika no valoriza nafatin inklui promove nafatin direitu umanu ba povu atu koñese di’ak liu ba lala’ok kona-ba nia direitu loloos iha ne’ebé no nia dever lolos iha ne’ebé,” dehan Administradór ne’e.
Jornalista : Hortencio Sanchez
Editór : Florencio Miranda Ximenes
