DILI, 10 dezembru 2021 (TATOLI)—Parlamentu Nasionál (PN) liuhosi debate iha faze espesialidade, iha sesta ne’e, aprova ona orsamentu Ministériu Ensinu Superior Siénsia no Kultura (MESSK) ba tinan 2022 ho montante $5.186.379, ho rezultadu votu afavór 42 kontra 0 no abstensaun 17.
Ministru Ensinu Superiór Siénsia no Kultura, Longuinhos dos Santos, agradese ba membru parlamentu sira tanba bele fó apresiasaun maka’as ba orsamentu ministériu ne’ebé aprezenta.
“Orsamentu ne’ebé hetan ona aprovasaun ba tinan oin sei ezekuta ho di’ak no responsabilidade,” Ministru hateten iha PN.
Notísia relevante: MESSK loke vaga 1.000 programa bolsa hakbiit iha tinan 2022
Orsamentu ne’e fahe ba kategoria saláriu no vensimentu $1.805.901, bens no servisu $2.871.838, transferénsia públika $314.000, kapitál dezenvolvimentu $195.000 no kapitál menór laiha.
Nune’e, sei prevee orsamentu hodi realiza programa kultura no patrimóniu $1.215.876, programa boa governasaun no jestaun institusionál $2.158.828 no programa edukasaun no informasaun $1.812.035.
Jornalista : Tomé Amado
Editora : Julia Chatarina
