DILI, 10 dezembru 2021 (TATOLI)—Parlamentu Nasionál liuhosi diskusaun faze espesialidade ba proposta lei Orsamentu Jerál Estadu (OJE) 2022 aprova tán orsamentu adisionál ho montante millaun $40 ba Ministériu Turizmu Komérsiu no Indústria (MTKI), hodi implementa programa Cesta Bázika.
Notisia Relevante: PN aprova millaun $40 ba SECoop implementa programa Cesta Bázika
Parlamentu Nasionál aprova proposta númeru 75 ho adisionál millaun $40 ba MKTI hodi kontinua implementa programa Cesta Básika iha tinan 2022.
“Orsamentu ne’e atu reforsa tan orsamentu ne’ebé antes ne’e aprova ona ba SEcoop ho montante millaun $40 hodi implementa kontinuasaun ba programa Cesta Bázika,” Deputadu proponente, Antoninho Bianco, hateten iha plenária, Parlamentu Nasionál, sesta ne’e.
Nune’e, ho millaun $40 ba MTKI propoin liután atividade Cesta Bázika ho objetivu estimula rekuperasaun ekonómia no atrai produsaun rai-laran tanba natar barak abandona, nune’e gradualmente osan labele sai ba li’ur no korre depedénsia produtu hosi rai-li’ur.
Títulu (Servisu/Órgaun) MTKI, kategória despeza bens no servisu ho programa kódiku 983 kona-ba investimentu no diversifikasaun ekonómika, dotasaun inisiál $1,215,141 ho alterasaun aumenta millaun $40, nune’e dotasaun finál sa’e ba $41,215,141.
Justifikasaun reforsa orsamentu ba programa Cesta Bázika, medida planu rekuperasaun ekonómika ho objetivu fornese alimentu no produtu ijiéne pesoál ba populasaun nasionál.
Ho objetivu prinsiál, medida ne’e atu apoiu família atendimentu nesesidade bázika, kontribui kombate hamlaha no vulneralibidade iha rejiaun ne’ebé pobreza, izoladu, hanesan apoiu agrikultór, produtór no komersiante lokál.
Ho forma estimula ekonómia lokál, ho meiu sirkulasaun rekursu finanseiru nesesesáriu ba aumenta produsaun nasionál.
Proposta ne’e mai hosi Antoninho Bianco, Francisco de Vasconcelos, Olinda Guterres no Maria Angélica Rangel da Cruz.
Ministru Turizmu Komérsiu no Undústria (MTKI), José Lucas do Carmo, hateten proposta ne’e hosi proponente sira presiza halo kontinusaun ba programa Cesta Bázika.
Nia dehan, implementasaun Cesta Bázika antes ne’e mezmu ho lakuna balun maibé lori duni multiplikadór estimula ekonómia lokál liu-liu toos-na’in no direta ba populasaun, nune’e MTKI aseita prospota ne’e.
Aleinde ne’e, PN aprova mós proposta OJE 2022 ho montante insiál ba Ministéiru Turizmu Komérsiu Indústria (MTKI) $13,584,356 ho votu a-favór 40, kontra sia (9) no abstensaun hitu (7).
“Nune’e, Orsamentu Jerál Estadu ba MTKI ho nia alterasaun númeru proposta sira pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária PN.
Orsamentu ba tinan 2022 ne’e, aloka ba saláriu bensimentu $1,828,184, bens servisu $5,490,852, kapitál menór $94,320, kapitál dezenvolvimentu $132,000 no transferénsia públika $6,039,000.
Hosi orsamentu ne’e hodi finansia programa tolu, sub-programa 15 no atividade 57 ne’ebé aloka ba programa boa-governasaun no jestaun instituisionál prevee $3,507,563, programa turizmu prevee $2,673,183 no programa investimentu no diversifikasaun ekonómiku no diversifikasaun eknómika prevee $7,403,610.
Aliénde ne’e, iha diskusaun faze espesialidde ba proposta lei Orsamentu Jerál Estadu (OJE) 2022 ne’e, Parlamentu Nasionál mós aprova proposta númeru rua hosi MTKI.
Jornalista : Nelson de Sousa
Editór : Cancio Ximens
