EKONOMIA, HEADLINE

EEI realiza workshop influénsia sistema bankaria ba ekonomia nasionál-globál

EEI realiza workshop influénsia sistema bankaria ba ekonomia nasionál-globál

Atividade workshop iha Eiros Entrepreneur Instutute, Mandarin, sábadu (11/12). Imajen TATOLI/Arminda Fonseca

DILI, 11 dezembru 2021 (TATOLI)–Eiros Entrepreneur Instutute (EEI), iha sábadu ne’e, realiza workshop kona-ba influénsia sistema bankária ba ekonomia nasionál no globál, ne’ebé partisipa hosi formandu hamutuk 42.

Diretór Ezekutivu Banku Nasionál Komérsiu Timor-Leste (BNCTL, sigla portugés), Brígido de Sousa, ne’ebé hanesan oradór, hateten, tópiku ne’e ko’alia kona-ba papél banku nian.

“Banku hotu ninia funsaun hanesan de’it mobiliza depózitu no fó kréditu ba ema atu halo serbisu hodi hetan rendimentu,” Diretór Ezekutivu Banku hateten iha salaun EEI, Mandarin,

Responsável Banku Nasionál ne’e esplika ba partisipante sira katak saida mak banku halo la sees hosi papél no influénsia banku atu asegura kresimentu no dezenvolvimentu ekonomia ne’ebé sustentável liuhosi banku nia-papél mobiliza depózitu no kréditu ba konsultivu ka setór privadu sira hodi haburas ekonomia rai-laran.

“Partikulamente setór privadu tenke sai hanesan raan no fuan ba ita-nia ekonomia, tanba ita-nia ekonomia daudaun ne’e depende ba fundu petrolíferu,” nia tenik.

Notísia relevante: PN aprova millaun $20 kapitaliza BNCTL

Nune’e liuhosi atividade ne’e, sei fahe informasaun, bainhira hakarak fundu petrolíferu labele hotu, parte hotu tenke investe setór produtivu.

“50% maihosi reseita doméstika no 50% maihosi fundu petrolíferu, tanba bainhira setór privadu ne’e dezenvolve ona, ita bele esporta sasán no bele prodús barak liután hodi kria empregu ba ema barak no selu taxa, sosa sasán, produsaun sa’e, bele dehan katak ita-nia reseita doméstika ne’e sa’e, ita bele asegura ona fundu petrolíferu to’o tempu ida ita bele rai ketak tiha, tanba ekonomia dezenvolvidu,” nia dehan.

Iha fatin hanesan, Diretór Ezekutivu EEI, João Paulo Gama Guterres, konsidera workshop ohin  importante tebes ba formandu sira tanba ne’e hanesan prosesu aprendizajen ida.

“Nune’e formandu sira no sosiedade bele hatene saida mak BNCTL halo ba dezenvolvimentu nasionál ida-ne’e, tanba dezenvolvimentu atu la’o labele depende de’it ba Governu, maibé setór privadu no Governu tenke kolabora,” nia enkoraja.

Nune’e mós, formandu, Igano Afonso de Oliveira, apresia no kontente tanba hetan oportunidade partisipa iha workshop, nune’e bele hatene oinsá lala’ok dezenvolvimentu nasionál.

Jornalista : Arminda Fonseca 

Editora     : Julia Chatarina

iklan
iklan

Leave a Reply

iklan
error: Content is protected !!