Eskola Sekundáriu Suai adia distribuisaun kaderneta ba estudante

COVALIMA  11  dezembru  2021  (TATOLI)—Eskola Sekundáriu Jerál Públiku Suai adia loron atu distribuisaun kaderneta ba estudante sira, ne’ebé loloos bazeia ba kalendáriu no sirkulár hosi Ministériu Edukasaun Juventude no Desportu (MEJD), distribuisaun loron 11 dezembru.

“Eskola Suai seidauk distribui tanba estudante finalista sira sei hahú ezame iha loron 13 dezembru, ne’ebé kadeira ho meza ami forma hotu ona, enkuantu bainhira distribui kaderneta inan-aman sira presiza tuur, ha’u koordena ona  ho responsável turnu  lorokraik na’in-rua, ami sei adia ba loron 20 dezembru maka foin distribui kaderneta,”  Diretór Eskola Sekundáriu Jerál Públiku Suai, Francelino Freitas Carvalho, informa, ba Agência TATOLI, iha ninia knaar fatin, sábadu ne’e. 

Aleinde ne’e, Gabinete Diretiva sei aprezenta mós relatóriu ba inan-aman sira ne’ebé durante ne’e kontribui osan ba eskola.

Nune’e, hafoin estudante finalista finaliza ezame nasionál no lokál maka foin  distribui kaderneta pasajen klase, ne’ebé inan-aman mak sei simu.

“Durante ne’e, inan-aman estudante sira kontribui osan ba eskola hodi selu propina profesór parsiál no konstribui ba konselu estudantil atu dezenvolve estudante nia talentu, ne’ebé ba tinan ida $1, ba siénsia prátika, ne’ebé kontribuisaun ne’e hodi estudante sira realiza aula prátika, desportu, bee-moos no saneamentu inklui fundu ba manutensaun mákina,” nia akresenta. 

Tuir Responsável Eskola, hosi kontribuisaun ne’e, atividade la’o di’ak, maibé iha atividade balun la la’o hanesan desportu tanba kondisaun COVID-19. 

Estudante iha Eskola Sekundáriu Jerál Suai hamutuk 2.175 no hosi númeru ne’e estudante finalista hamutuk na’in-600 resin. 

Jornalista : Celestina Teles

Editora     : Julia Chatarina