DILI,13 dezembru 2021 (TATOLI) – Ekipa rai na’in kapitál Dili, Karketu Dili FC, iha segunda ne’e, la konsege konkista nia vitória kontra Lalenok United FC iha jogu primeira divizaun Liga Futeból Timor-Leste (LFTL) ne’ebé hala’o iha Estádiu Munisipál Dili.
Maski, empate 1-1 ho Lalenok, maibé Karketu nafatin lidera tabela klasifikasaun provizáriu ho pontu 11 no sai mós kandidatu forte ba kampiaun LFTL époka ne’e. Maski hela de’it ona jogu ida kontra AS Ponta Leste.
Hanesan bainbain jogu komesa jogadór hosi parte rua simu ona orientasaun hosi treinadór ekipa ida-idak nian atu lansa kontra no atake ne’ebé sériu ba malu atu buka hatama golu, nune’e bele save pontu tolu.
Jogadór hotu konsege utiliza tékniku no abilidade ne’ebé treinadór haraik ba sira hodi lansa kontra no atake ba malu ho velosidade ne’ebé makas, maibé hosi minutu 1 to’o 44 jogu la’o balansu hela no laiha ekipa ida mak prodús golu.
Maski, avansadu Karketu no Lalenok halo ameasa ne’ebé makas ba malu, maibé guarda rede na’in rua Frenky (20) hosi Karketu no Fagio Pereira (20) hosi Lalenok konsege salva no barak mak la kona iha alvu.
Joga dolar to’o minutu 45+, teki-teki bola barullu iha liña oin, Karketu nian jogadór Daniel Adadi (11) hetan aportunidade di’ak hodi hatama golu 1-0. Ho nune’e, árbitru termina jogu primeira parte
Hakur ba jogu segunda parte ekipa rua nafatin mantein rítmu jogu hodi halo kontra no atake ne’ebé makas, maibé ekipa esforsu makas atu hatama golu hodi bele muda rezultadu.
Esforsu hirak ne’e la hela de’it hanesan esforsu no loko an ne’ebé Lalenok halo rai hela venenu ba sira nia ekipa tanba la konsege konkista vitória ne’ebé sira mehi no save ona iha minutu primeira parte.
Molok, Karketu fera manu-tolun tenke liuhosi prosesu ne’ebé naruk iha kampo kuadradu ne’e nia laran, hosi minutu 46 to’o 89 la konsege fura golu ruma, nune’e iha minutu 90 jogadór Abaty (10) hetan asisténsia bola ida hosi nia amigu Nataniel Reis (8), ne’ebé Abaty konsege kabesa tama liu bá rede hodi muda rezultadu ba empate 1-1.
Árbitru sei fó tan minutu adisionál lima ba ekipa rua hodi hala’o jogu, maibé la utiliza oportunidade ho di’ak to’o minutu remata laiha golu foun.
Hosi rezultadu ne’e fó biban ba Karketu nafatin ukun tabela klasifikasaun ho pontu 11, AD SLB ho pontu hitu, Lalenok ho pontu hitu, Ponta Leste ho hitu, Assalam pontu haat, Aitana FC pontu haat, ikus liu DIT ne’ebé sei iha jona mean ka ho pontu 0.
Jornalista : Hortencio Sanchez
Editór : Florencio Miranda Ximenes
