COVALIMA, 13 dezembru 2021 (TATOLI)—Mota Tafara fó ameasa ba komunidade ne’ebè hela iha Suku Suai loro, aldeia Loro, bairru Sukabi Mesak, postu administrativu Suai Vila, munisípiu Covalima.
Komunidade ho uma kain 15 ne’ebè hela iha aldeia Loro bainhira tempu udan defisil halo movimentu tanba volume bee-mota boot hodi fó ameasa ba komunidade.
“Maske mota fo ameasa ba ami no ami labele husik fatin ida-ne’e, tanba fatin ida-ne’e ami livre atu haki’ak animál hodi buka moris hela iha vila defisil ita atu haki’ak animál,” Komunidade. Fernandu Seran, hato’o preokupasaun bainhara partisipa iha serimónia lansamentu kuda batar Sele iha aldeia Loro, segunda ne’e.
Oras ne’e dadaun, bainhira komunidade halo movimentu atu ba aldeia refere, tratór mak tula hela sira tanba mota boot halo komunidade sira labele hakat no hakur mota ba-mai.
Tanba ne’e, komuniade husu ba administradór munisípio Covalima, Francisco de Andrade, atu harii bronzon nune’e bele Satan Mota atu labele fó ameasa ba komunidade nia to’os hodi estraga ai-han no komunidade.
Xefe aldeia Loro, Francisco António Oliveira, reforsa Mota Tafara fó ameasa tebes ba komunidade ne’ebè mak hela iha aldeia refere tanba presiza atu harii bronzon hodi satan bee-mota.
“Ita hatene agora époka udan, halo mota tun makaas difikulta ami atu halo movimentu. Se bele, administradór tenke harii bronzon hodi satan mota, atu labele fó ameasa ba komunidade ho sira-nia to’os,” nia informa.
Se iha tempu udan mak autoridade munisipál la halo intervensaun antes, ida-ne’e sei fó ameasa boot ba komunidade ne’ebè hela iha aldeia refere.
Hatán ba preokupasaun ne’e, Administradór Munisípio Covalima, Francisco de Andrade klarifika, durante ne’e Institutu Jestaun Ekipamentu (IGE, sigla portugés) mak fó apoiu.
“Ha’u mós husu ona apoiu tanba ho limitasaun ekipamentu mo agora sei halo estrada iha suku Usecai, postu administrativu Zumalai no sira laiha transporte atu tula Eksa,” nia esplika.
Jornalista : Celestina Teles
Editór : Cancio Ximenes
