iklan

EKONOMIA, BOBONARO, HEADLINE, IMAJEN, MUNISÍPIU

PAM Bobonaro propoin loke merkadu tradisionál iha fronteira

PAM Bobonaro propoin loke merkadu tradisionál iha fronteira

Prezidente Autoridade Munisípiu Bobonaro, Ernesto de Oliveira Barreto. Imajen Tatoli/Sérgio da Cruz.

BOBONARO, 13 dezembru 2021 (TATOLI) – Prezidente Autoridade Munisípiu Bobonaro, Ernesto de Oliveira Barreto, propoin ba Governu Sentrál loke merkadu tradisional iha fronteira terrestre entre Timor-leste no Indonézia hodi prevene movimentasaun atividade ilegál.

Nia informa, planu loke merkadu tradisionál ne’e autoridade Bobonaro  planeia dezde tempu administradór João Vicente (matebian) ne’ebé konsege  halo ona negosiasaun ho autoridade Atambua, Indonézia.

Enkuantu iha diálogu ne’e, kooperasaun rai-rua nian konsege la’o ho di’ak tanba autoridade Atambua prontu ofere rai ektare rua atu harii merkadu tradisionál iha fronteira Mota-Ain maibé momentu ne’e planu refere la konsege realiza tanba negosiasaun refere la konsulta ho Governu Sentrál.

“Tanba ne’e mak ha’u hanesan prezidente autoridade laiha kompeténsia, entaun agora prepara ona proposta atu propoin ba Governu Sentrál atu loke merkadu tradisionál iha fronteira rai rua nian,” nia informa ba jornalista sira, iha Jináziu Maliana, segunda ne’e.

Nia  afirma, razaun autoridade munisipál propoin governu atu loke merkadu tradisionál ne’e tanba durante ne’e observa, maske lei bandu sidadaun sira labele ultrapasa fronteira ilegalmente, maibé atividade tranzaksaun ilegál ba sasán hanesan sigarru, mina, fogete no sasán kontra bandu seluk tán kontinua buras iha fronteira Bobonaro.

Merkadu lokál ne’ebé autoridade Bobonaro propoin atu loke ne’e mak ida iha fronteira Mota-ain, suku Batugade, postu administrativu Balibo no ida iha área Tunubibi, suku Tapo-Memo, postu administrativu Maliana, nune’e fasil kontrola komunidade sira-nia atividade.

“Alternativu úniku mak tenke loke merkadu tradisionál, sé lae ita bele tau fosa halo nusá mós sira nafatin halo atividade ilegál tanba nesesidade mak obriga. Sé kabun la obriga sira la ba ida, mais prontu proposta ida-ne’e ministériu kompetente aprova ka lae, ita hein ninia resposta,” nia afirma.

Autoridade munisípiu ne’e fiar katak, bainhira governu loke merkadu tradisionál iha fatin rua ne’e, sei redús movimentu atividade tranzaksaun ilegál iha fatin risku sira.

Jornalista         : Sérgio da Cruz

Editór               : Evaristo Soares Martins

iklan
iklan

Leave a Reply

iklan
error: Content is protected !!