VIQUEQUE, 14 dezembru 2021 (TATOLI)-–Administrasaun munisípiu Viqueque, iha tersa ne’e, fó kapasitasaun ba xefe suku humutuk na’in 36 hodi prinxe livru demografia iha kada suku.
“Ami fó kapasitasaun téknika prienxe livru demografia, ne’ebé Ministériu Administrasaun Estatál (MAE) distribui mai Viqueque hodi distribui ba suku 36, nune’e líder komunitáriu sira bele kompriende prienxe demografia iha suku,” Administradór munisípiu Viqueque, Januário Soares ‘Bolly’, informa ba Agência TATOLI, hafoin ramata abertura atividade, iha salaun administrasaun munisipál Viqueque.
Tuir autoridade munisipál ne’e, xefe suku sira presiza hatene livru ne’e atu sira bele relata ba postu, munisípiu no nasionál.
“Ohin ami breafing xefe suku sira kona-ba prienxe livru demografia no seluk tan iha livru laran. Atu orienta xefe suku sira hodi kumpre dever no obrigasaun, tanba tinan oin ita sei iha mudansa oituan. Nune’e, xefe suku sira bele iha ona koñesimentu,” nia akresenta.
Kapasitasaun realiza durante loron-ida no bainhira ramata kapasitasaun mak sei atribui livru demografia ba xefe suku sira hodi lori ba ida-idak ninia suku.
“Tuir loloos livru atribui antes ona, maibé tanba situasaun COVID-19, entaun ami la konsege distribui,” nia tenik.
Jornalista : Vitorino Lopes da Costa
Editora : Julia Chatarina
