DILI, 14 dezembru 2021 (TATOLI)-–Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), iha tersa ne’e, realiza teste eskrita lian inglés ba kandidatu traballadór timor-oan na’in-3.714, hosi Seasonal Worker Programme (SWP) Austrália.
Teste hala’o iha salaun Institutu Nasionál Formasaun Dosente no Profesionál Edukasaun Timor-Leste (INFORDEPE), durante loron tolu, hahú loron 14 to’o 16 dezembru.
Diretór Nasionál Empregu Exteriór, Filomeno Soares, hateten, objetivu teste atu kompleta rekezitu selesaun ba kandidatu traballadór SWP hosi munisípiu Dili, ne’ebé halo ona iha tinan kotuk, tuir prosedimentu legál ne’ebé hatuur ona katak tenke tuir teste fíziku no lian inglés.
“Hosi prosesu teste, ita sei la deskualifikadu ema ida, maibé atu hatene kandidatu traballadór sira-nia nível koñesimentu lian inglés iha klasifikasaun A, B ka C,” Diretór hateten liuhosi nota ne’ebé Agência TATOLI asesu, tersa ne’e.
Notísia relevante: Traballadór SWP Austrália 280 kontratu ramata ona
Nune’e, Dirijente ne’e husu ba kandidatu traballadór sira atu mantein disiplina durante prosesu, hodi prienxe matéria ho didi’ak, tanba atu difine nível lian depende ba idaidak, enkuantu ekipa DNEE fasilita de’it.
“Ha’u-nia mensajen ba kandidatu traballadór sira, mantein buka informasaun atubele deside ita-boot sira-nia an no kuidadu saúde, tanba atu ba serbisu iha Austrália persiza ema ne’ebé la iha moras,” nia hameno.
Kandidatu traballadór 3.714 ne’ebé tuir teste lian inglés, kompostu hosi mane 2.605 no feto 1.109.
Jornalista : Arminda Fonseca
Editora : Julia Chatarina
