BOBONARO, 14 dezembru 2021 (TATOLI) – Komunidade postu administrativu Atabae, munisípiu Bobonaro, simu ona vasinasaun doze daruak hamutuk 3,868 korresponde ho 63 %.
“Iha postu administrativu Atabae totál populasaun 11,119 no sira-ne’ebé simu vasinasaun doze primeiru hamutuk 6,001 ho 98%. Tuir ema-ne’ebé simu vasinasaun segundu doze 3,868 ho 63% nomós sira-ne’ebé seidauk vasina 2.213,” Xefe Ekipa Vasinasaun Sentru Saúde Atabae, Roberto Daobiten, informa ba jornalista sira bainhira halo vasinasaun ba komunidade sira iha aldeia Beacou, suku Aidabaleten, Atabae, segunda ne’e.
Nia fó-sai katak, durante ne’e komunidade balun ta’uk lakohi simu vasina tanba ho informasaun falsu ne’ebé espalla iha mídia sosiál maibé parte saúde kontinua esplika vantajen hosi vasinasaun ne’e.
Iha parte seluk, nia atualiza katak, durante ne’e hala’o servisu vasinasaun ba komunidade sira iha Atabae, serbisu hamutuk ho International Organization for Migration (IOM) hadi halo screening mós ba moras Tuberkuloze (TBC).
Iha senturu senturu saúde Atabae hala’o screening ba komunidade hamutuk 212 no deteta pasiente pozitivu moras Tuberkuloze na’in-ualu.
“Moras Tuberkuloze nia kauza hosi kutun ida naran mikro baktéria Tuberkuloze ho nia síntoma hanesan ema-ne’e me’ar liu semana rua nia laran. Iha kabén-tasak kahur ho raan dalaruma halo isin-manas no laiha vontade atu hán,” Xefe Ekipa Vasinasuan Sentru Saúde Atabae ne’e informa.
Entretantu, Xefe aldeia Beacou, suku Aidabaleten, Sérgio Pedruco, informa doutór sira iha sentru saúde halo vasinasaun ba komunidade sira no balun foin simu doze primeiru no balun kompleta ona.
“Agora ema hotu-hotu iha ona konxiénsia atu simu vasinasaun, fofoun ne’e ema ta’uk maibé autoridade informa beibeik no komunidade iha konxiénsia rasik simu vasinasaun. Iha aldeia Beacou maioria maka simu ona, hela de’it balun maka seidauk simu,” Xefe aldeia Beacou informa.
Jornalista : Francisco Sony
Editór : Evaristo Soares Martins
