DILI, 14 dezembru (TATOLI)— Deputadu sira iha Parlamentu Nasionál aprova Orsamentu Jerál Estadu (OJE) 2022 ho montante $1,576,870 ba Sekretariadu Tékniku Administrasaun Eleitorál (STAE) iha espesialidade ho votu afavor 47, abstensaun 14 no kontra 0.
Tuir livru 2 planu anual OJE 2022, STAE prevee $1,576,870 hodi aloka ba saláriu vensimentu $577,248, bens servisu $842,122, kapitál menór $157.500, kapitál dezenvolvimentu laiha no transferénsia públika laiha.
“Orsamentu ba Sekretariadu Tékniku Administrasaun Eleitorál hamutuk $1.576.870 pasa,” Prezidente Parlamentu Nasionál, Deputadu Aniceto Longuinhos Guterres Lopes, hateten, iha sala plenária Parlamentu Nasionál, tersa ne’e.
Orsamentu ne’e hodi finansia programa ida (1), sub-programa tolu (3) no atividade neen (6).
Programa boa-governasaun no jestaun instituisional ho nia sub-programa boa-governasaun no nia atividade apoiu jurídiku.
Sub-programa jestaun instituisionál nia atividade jestaun finanseira administrasaun no jestaun finanseira lojístika, jestaun rekursu umanu, aprovizionamentu jestaun kontratu.
Sub-programa administrasaun eleitorál nia atividade mak halo resensiamentu eleitorál no edukasaun eleitorál.
Antes ne’e, Sekretáriadu Tékniku Administrasaun Eleitorál (STAE) prevee millaun $9.3 iha Orsamentu Jerál Estadu (OJE) 2022, liuhosi Dotações para Todo o Governo hodi bele organiza eleisaun prezidensiál iha marsu 2022.
“Ita iha proposta millaun $9,3, fundu kontijénsia liuhosi dotação todo Governo hodi organiza eleisaun prezidensiál iha tinan oin,” Diretór Jerál STAE, Acilino Branco, hateten ba jornalista sira hafoin halo audiénsia públika ho komisaun A Parlamentu Nasionál.
STAE kria hosi dekretu Governu númeru 2/2003, 23 jullu, hanesan órgaun hosi Ministéiru Administrasaun Estatál (MAE), responsavel hosi organizasaun no ezekusaun ba prosesu eleitorál hosi Estadu (Decreto-Lei n.º 1/2007 de 18 de janeiro).
Notísia Relevante: MAE: eleisaun prezidensiál 2022 sei la’o ho forma imparsiál-neutru
Jornalista : Natalino Costa
Editór : Florencio Miranda Ximenes
