DILI, 14 dezembru 2021 (TATOLI)—Timor-Leste Press Union (TLPU) no Asosiasaun Jornalista Timor Lorosa’e (AJTL) konsidera saudozu Max Stahl hatudu ona ninia dedikasaun no domin ba Timor-Leste liuhosi knar jornalistika hodi filma Masakre Santa Crúz, no ninia obra ne’e sai ona memória eterna ba timor-oan sira.
“Max Stahl hatudu ona ninia korajem, dedikasaun no domin ba povu no rai Timor-Lorosa’e, liuhosi knar jornalístika ba kobertura masacre Santa Cruz 1991 hodi fó sai ba mundu atu hatene kona-ba kruelidade ne’ebé halakon timor oan barak nia vida. Max Stahl nia obra sai ona memória eterna ba timor oan sira,” Porta Voz TLPU no AJTL, Zezito da Silva, hateten liuhosi Konferénsia Imprensa ne’ebé hala’o iha resintu Arquivu Muzeum Rezistensia Timorense, Dili, tersa ne’e.
Saida mak Max Stahl defende bainhira nia sei moris, AJTL no TLPU tane ida ne’e hodi sai defensór ba liberdade imprensa no liberdade espresaun hodi guia profisionál komunikasaun sosial, fotógrafu, blogger, eskritór, ativista no seluk tán, ne’ebé sai membru ativu iha asosiasaun sira atu luta ba konstrusaun Estadu ida-ne’ebé justa, fraterna, prosperu no ba dezenvolvimentu ida ne’ebé solidária no fraterna tuir preámblu Konstituisaun Repúblika Demokrátika Timor-Leste (RDTL) nian.
Liuhosi biban ida-ne’e, TLPU no AJTL hakarak hato’o sentidu pézames ba família matebian jornalista Max Stahl ne’ebé husik ona mundu iha 28 outubru 2021 iha Austrália, tanba moras onkolójika ka kánkru ne’ebé nia sofre durante iha tinan barak nia laran.
“TLPU no AJTL, enkuantu, mahon ba jornalista timor-oan sira sente lakon éroi boot Max Stahl nia falesimentu. Tanba ne´e, asosiasaun rua fó omenajen ba éroi loloos, ba defensór direitu umanu, liberdade imprensa no espresaun iha rai ida-ne´e,” nia dehan.
Nune’e, relativamente ho Max Stahl nia ahu-kdasan ne’ebé sei to’o mai iha Timor-Leste iha kuarta (15/12/2021), TLPU ho AJTL hakarak konvida jornalista sira hotu hodi konsentra iha Aeroportu Internasionál Nicolau Lobatu Dili hodi simu Max Stahl nia ahu-kdesan hodi fó onra ba grande jornalista Max Stahl.
“Tanba Max Sthal nia korajen no dedikasaun iha mundu jornalizmu sai nu’udar ezemplu boot tebes ba jornalista foun timor-oan sira, hodi nafatin luta kontra dezumanidade iha rai ida-ne’e. Ho nune´e mak jornalista timor-oan sira tenke kaer metin nafatin espíritu Max Stahl nian, hodi luta ba direitu umanu iha Timor-Leste,” nia hateten.
TLPU-AJTL rekomenda tau Max Stahl nia naran ba Avenida
Tanba ne’e, atu rekorda no rekoñese Max Stahl nia esfotrsu hotu, TLPU ho AJTL rekomenda ba Estadu atu garante liberdade espresaun no imprensa iha Timor-leste, tanba Max Stahl nia luta mai ho baze jornalizmu mak hafanu mundu kona-ba asaun kruel invazór sira-nian, no promove no prezerva obra hosi jornalista Max Stahl nian.
TLPU no AJTL rekomenda ba Estadu atu fó apoia ba Centro Audivizual Max Stahl no apoia transformasaun CAMSTL ba Institutu Públiku no ikus atribui naran Max Stahl ba avenida ruma iha Timor-Leste.
Hosi ne’e, AJTL ho TLPU tane aas nafatin obra valioza ne’ebé saudozu Max Stahl husik hela ba timor-oan sira, la’ós de’it ba edifikasaun Estadu direitu demokrátiku ida-ne’e, maibé aktu ezemplar hosi saudozu hodi sai verdadeiru, defensór ba direitu humanu, liberdade imprensa no liberdade espresaun.
Jornalista : Nelia Fernandes
Editór : Cancio Ximenes
