DILI, 14 dezembru (TATOLI)— Ministériu Interior (MI) liuhosi Sekretáriu Estadu Protesaun Sívil (SEPS), Joaquim Gusmão, hamutuk ho Komisaun Funsaun Públika (CFP, sigla Portugés), tersa ne’e, fó pose ba kadete foun ka korpu bombeiru nain-60.
“Ohin, ita fó pose ba kadete foun bombeiru hamutuk nain-60, atu hahú halo serbisu hanesan pesoál bombeiru hodi halo atendimentu ba públiku bainhira iha dezastre naturál ruma,” Sekretáriu Estadu ne’e, hateten ba jornalista sira hafoin ramata seremonia pose iha SEPS-Caicoli, tersa ne’e.
SEPS ho CFP halo rekerutamentu pur meritu ba kadete foun na’in-60 iha tinan 2020, atu reforsa serbisu bombeiru iha munisípiu neen hanesan Ainaro, Bobonaro, Baucau, Covalima, Lautém no Viqueque.
Governante ne’e, afirma kadete nain-60 sei tuir treinamentu fulan-ida, liuliu iha área administrasaun, bombeiru nian hodi antisipaba insendiu.
Nune’e, Sekretáriu Estadu ne’e husu ba kadete foun bombeiru sira atu serbisu ho diak, nune’e bele fó atendimentu ba públiku.
“Ha’u husu atu halo serbisu di’ak ho profesionál atu fó atendimentu ne’ebé di’ak ba públiku iha situasaun emerjénsia,” Joaquim Gusmão enkoraja.
Iha biban hanesan, Komisária Komisaun Funsaun Públiku (KFP), Maria de Jesus Sarmento, mós enkoraja ba kadete foun korpu bombeiru mantein serbisu ne’ebé diak liuhosi fó asisténsia no atendimentu ba públiku.
“Ha’u kongratula no enkoraja imi ne’ebé liu rekrutamentu ho merítu ne’e atu serbisu ho profisionál atu fó atendimentu ba públiku liuliu tane aas interese nasionál,” nia enkoraja.
Notísia Relevante: SEPS hahú prepara kondisaun hasoru fenómenu La Niña
Jornalista : Natalino Costa
Editór : Florencio Miranda Ximenes
