Membru Governu sei iha kartaun identifikasaun ba asesu kondisionadu
DILI, 15 dezembru 2021 (TATOLI)–Governu liuhosi reuniaun Konsellu Ministru (KM), aprova Projetu Dekretu Governu kona-ba modelu kartaun espesiál ba identifikasaun membru Governu sira.
“Inisiativa ne’e estabelese direitu membru Governu ba kartaun espesiál identifikasaun, ne’ebé permite sira atu livre sirkula iha fatin públiku, ba asesu kondisionadu hodi hala’o sira-nia funsaun,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu, iha Palásiu Governu, kuarta ne’e.
Diploma ne’e ho objetivu atu kumpre ba dispostu iha alinea d hosi númeru 2 artigu da-26 kona-ba Estatutu Titulár ba Orgaun Soberania, ne’ebé aprova hosi Lei númeru 7/2007, loron 25 jullu
Projetu Dekretu Governu ne’e, aprezenta hosi Ministru Prezidénsia Konsellu Ministru, Fidelis Manuel Leite Magalhães.
Daudaun ne’e VIII Governu Konstitusionál iha pasta hamutuk 46 hosi membru Governu hamutuk 43, kompostu hosi Primeiru-Ministru ida, Vise Primeiru-Ministru rua, Ministru 20, Vise-Ministru 12 no Sekretáriu Estadu 11.
Jornalista : Antónia Gusmão
Editora : Julia Chatarina
