DILI, 15 dezembru 2021 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, garante molok fulan ne’e ramata, parte ministériu sei submete lista benefisiáriu inzensaun propina ba estudante semetre par ba Ministériu Finansa (MF).
“Ha’u garante molok fulan ne’e ramata lista estudante ba segundu faze semestre par bele submete ona ba Ministériu atu hetan pagamentu,” Ministru dehan iha resintu Parlamentu Nasionál (PN) kuarta ne’e.
Notísia relevante: Estudante 34.307 hosi universidade 16 simu inzensaun propina faze daruak
Antes ne’e, parte MESSK simu dadus estudante hosi universidade 18 iha territóriu nasionál hamutuk 64.466, maibé to’o pagamentu faze dahuluk hetan de’it estudante 51.178, ne’ebé estudante 7.960 laiha informasaun.
Bazeia ba númeru estudante ne’ebé iha, Governu hasai osan kuaze $5.617.862,50 hodi transfere ba konta bankária universidade 18 nian, maibé totál osan ne’ebé iha gasta $2.756.947, enkuantu $1.496.536 seluk fila ba kofre Estadu.
Jornalista : Tomé Amado
Editora : Julia Chatarina
