DILI, 15 dezembru 2021 (TATOLI)–Governu liuhosi reuniaun Konsellu Ministru (KM), iha kuarta ne’e, aprova projetu deliberasaun ne’ebé aprezenta hosi Ministru Finansa, Rui Augusto Gomes, nune’e etapa tuir mai sei iha selebrasaun akordu entre Timor-Leste no Ajénsia Kooperasaun lnternasionál Koreia (KOICA).
“Projetu dahuluk ho objetivu atu aprova akordu projetu entre parte rua relasiona ho projetu ‘Hatete Lae ba 55 (Hamlaha no Elmintiaze, ne’ebé tranzmite hosi solu, moras kulit, fuma no bebida midar ka alkólika) iha eskola sira’, nune’e mos atribui ba Ministru Finansa podér atu asina akordu ne’e,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu.
Portavoz Governu ne’e dehan, projetu ne’e ho durasaun tinan-haat, ho objetivu prinsipál atu fornese ba labarik sira ho idade eskolár ba Pakote Saúde Primáriu no Edukasaun Saúde iha ambiente eskolár ida seguru no saudável hodi hamenus risku hosi moras iha eskola no hadi’a eskola hodi oferese ambiente ida seguru no saudável, hanesan merenda eskolár ne’ebé seguru no nutrisaun di’ak.
Nune’e, sei implementa projetu ne’e iha munisípiu tolu hanesan Baucau, Bobonaro no Manufahi, no sei envolve departamentu governamentál sira ne’ebé responsável iha área edukasaun no saúde.
Jornalista : Antónia Gusmão
Editora : Julia Chatarina