DILI, 16 dezembru 2021 (TATOLI)—Sentru Quesadhip Ruak (CQR), kinta ne’e simu doasaun nesesidade bazika hosi Timor Plaza (TP) ho Chinese Merchants Uniaun Association Timor–Leste (CUAT) hodi selebra Natal hamutuk no fahe nesesidade bázika ba família kbiit laek sira iha munisípiu.
“Ohin, ita simu doasaun hosi organizasaun sira hanesan asosiasaun komersiál komunidade Xinesa timor-oan ne’ebé lidera hosi Kathleen Fon ha Gonçalves sira fó apoia hanesan foos, supermie, biskuei no mós asosiasaun Xineza hosi Beijing, hanesan xina sira-ne’ebé halo negósiu iha Timor, sira mós iha asosiasaun no sira mós organiza apoia doasaun balun fó ba fundasaun atu selebra natal hamutuk ho ita–nia familia kbiit laek sira,” Fundadora Fundasaun Sentru Quesadhip Ruak, Isabel da Costa Ferreira, hateten ba Agência Tatoli, iha Sentru Quesadhip Ruak, Taibesi, Dili.
Asosiasaun xinesa sira-ne’e fó mós foos, trigu, masin, supermie, mina, susu-been inklui boneka no roupa ba labarik sira.
Aleinde ne’e, nia dehan, na’in ba Timor Plaza avó Jape mós fó brinkeiru ho totál hamutuk 100 ba labarik sira, entaun atividade ohin ne’e mai atu simu de’it apoia doasaun hosi organizasaun sira no mós individuál hanesan avó Jape.
Hosi doasaun ne’e fundasaun iha programa ho familia kbiit laek no mós familia sira-ne’ebé foin forma uma kain no bolu programa konta de bebé no mós joven sira.
“Iha Natal, ita sempre ho atividade sira-ne’e, ita oferese ba família sira-ne’ebé sai ona hanesan benefisiáriu ba programa fundasaun nian no ita–nia planu iha semana ida-ne’e no semana oin sei integra ba família sira ho labarik sira,” fundadora ne’e informa.
Hosi doasaun ne’e, planu atu lori fila–fali ba Manufahi iha loron 21 sei entrega apoia hirak ne’e ba familia hamutuk 100 ne’ebé sai hanesan benefisiáriu ba programa konta de bebé.
Alende ne’e, sei fó apoia ba labarik orfonatu sira-ne’ebé durante ne’e fundasaun fó apoia inklui idozu sira, tanba iha mós idozu sira-ne’ebé sai hanesan benefisiáriu ba programa fundasaun ni’an, ne’ebé tempu naruk akompaña ona sira, hanesan iha familia lima ne’ebé fundasaun akompaña loro–loron sira–nia moris no lori mós ai–han ruma ba sira iha tempu natal ida-ne’e.
Tuir planu, Sentru Quesadhip Ruak sei oferese nesesidade bázika hirak ne’e ba familia ne’ebé hela iha munisípiu hanesan iha Manufahi família hamutuk 100, Aileu 61, Liquiça 48 no Dili 100-resin inklui Ataúro.
“Maibé, ita haree apoia sira-ne’e la to’o, entaun fundasaun sei apoia tan ho fundasaun nia kbiit hodi kompleta buat ne’ebé sira fó, atu nune’e bele fó apoia ba familia sira-ne’e hotu,” nia dehan.
Entretantu, doasaun ne’ebé Sentru Quesadhip ohin simu hosi Chinese Merchants Uniaun Association Timor–Leste (CUAT), hanesan foos kilógrama 20 ne’e saka 50, trigu saka 10, masin-midar klógrama 50, supermie dos 50, masin dos rua (2), susu-been dos 10, mina dos 10, boneka 400 no roupa 480, no doasaun hosi Avó Jape hanesan brinkeiru ba labarik hamutuk 100.
Jornalista : Nelia Fernandes
Editór : Cancio Ximenes
