COVALIMA, 16 dezembru 2021 (TATOLI)—Responsável Postu Saúde Ogues, Carlos da Cunha Moniz, hahú iha fulan-outubru to’o novembru tinan ne’e númeru moras infesaun vias respiratória aas iha postu saúde Ogues, munisípiu Covalima.
“Durante fulan rua hahú fulan-outubru to’o novembru ami rejista númeru moras ne’ebè aas mak moras imfesaun vias respiratóriu iha postu saúde Ogues,” Carlos da Cunha Moniz informa ba Agência Tatoli iha postu saúde Ogues, kinta ne’e.
Postu saúde Ogues rejista moras aas tanba bazea dadus hosi fulan outubru rejista moras infesaun via srepiratóriu hamutuk 144 kompostu hosi mane 55 no feto 89.
Iha fulan-novembru rejista moras infesaun vias respiratóriu hamutuk 182 kompostu hosi mane 58 feto 124 inklui mós rejista moras sira seluk hanesan moras kulit, isin katar, konsulta ba nutrisaun nian gastritis, tensaun aas no seluk tán.
Atu hadook an hosi moras infesaun vias respiratória husu ba komunidade tenke hamoos ambiente hodi hamoos uma laran no uma ninin sira ho rutina no momoos.
“Ita atu hadok an hosi moras ne’e ita tenke hamoos ita-nia ambiente hanesan ita hamoos ita-nia uma laran. Ita hatene agora tempu udan, nune’e moras diária no dangue sei aumenta bainhira la hamoos ambiente,” nia dehan.
Nia haktuir, pesoál saúde iha postu saúde Ogues aleinde halo atendementu iha postu saúde, sira mós halo atendementu ba komunidade sira tama sai suku.
Durante pesoal saúde sira tama-sai suku ho objetivu atu haree ema ho difisiénsia, moras mentál no moras hada’et.
“Ami deteta moras sira, ami mai halo relatóriu hodi informa katak iha suku sira-ne’ebè mak ami identifika moras mentál no ema ho difisiénsia no TBC,” nia hateten.
Hafoin identifika moras hirak ne’e, pesoál sira informa kedas ba médiku sira hanesan atu atende moras mental kona-ba moras TBC fo kedas tratamentu.
Jornalista : Celestina Teles
Editór : Cancio Ximenes
