DILI, 17 dezembru 2021 (TATOLI)–Ajénsia Nasionál Avaliasaun Akreditasaun Akadémiku (ANAAA) foti desizaun liuhosi enkontru Konsellu Diretivu, aprezenta ona relatóriu prelemináriu ba Ministériu Ensinu Superiór Siénsia no Kultura (MESSK) relasiona ho rezultadu avaliasaun ba programa 25 iha instituisaun hitu.
Diretór Ezekutivu ANAAA, Edmundo Viegas, hateten, desizaun kona-ba avaliasaun nian deside ona iha enkontru Konsellu Diretivu no bele aprezenta ona ba Ministru Ensinu Superiór Siénsia no Kultura, Longuinhos dos Santos, nu’udar superiór ne’ebé lidera serbisu iha instituisaun Ensinu Superiór.
“Ita iha obrigasaun aprezenta rezultadu ne’ebé halo ona ba programa 25 iha instituisaun Ensinu Superiór públiku no privadu ba Ministru, atu nune’e bele hetan apresiasaun no saida mak ANAAA prodús tenke submete ba MESSK atu nune’e bele públika fali rezultadu ba instituisaun hitu ne’ebé nia programa hetan ona avaliasaun,” Diretór Ezekutivu ANAAA informa ba Agência TATOLI, foin lalais ne’e iha ninia knaar fatin, Matadoro.
Notísia relevante: ANAAA asegura rezultadu avaliasaun kursu 25 iha IESPP
Programa 25 ne’ebé hetan avaliasaun no re-avaliasaun ne’e kompostu kursu neen hosi Universidade nasionál Timor-Lorosa’e (UNTL) hanesan kursu Edukasaun Fízika Desportu iha Fakuldade Edukasaun Arte Umanidade hetan re-avaliasaun no kursu lima seluk maka Relasaun Internasionál, Komunikasaun Sosiál, Lian Tetum, Farmásia no Kursu Nutrisaun.
Kursu haat iha Universidade Orientál Timor Lorosa’e (UNITAL), Instituisaun Superiór Cristal (ISC, sigla portugés) kursu ida, Dili Institute of Technology (DIT) kursu ida, Universidade de Dili (UNDIL) kursu haat, no Universidade da Pas (UNPAZ) kursu haat.
“Agora prosesu avaliasaun ba institusionál ualu hahú ona no iha Oé-cusse fiun mak termina. Bainhira rezultadu avaliasaun tuir prosedimentu legál mak sei finaliza iha tinan oin liuhosi rezultadu enkontru Konsellu Diretivu,” nia akresenta.
Jornalista : Tomé Amado
Editora : Julia Chatarina
