DILI, 17 dezembru 2021 (TATOLI)–Ministériu Edukasaun, Juventude no Desportu (MEJD) tinan ne’e konsege distribui ona kaderneta eskolár 178.406 ba estudante Ensinu Báziku siklu 1,2 iha territóriu nasionál.
Diretór Jerál Administrasaun no Finansa MEJD, Antoninho Pires, relata, kaderneta eskolár ne’ebé sira distribui ona ba eskola Ensinu Báziku ne’e halo produsaun durante tinan-rua ba kotuk no asegura hela iha armazen ministériu nian.
“Ita distribuisaun kaderneta eskolár ba Ensinu Báziku siklu 1,2, ba kategoria ba klase 1 no 2 hamutuk 53.510, klase 3,4 hamutuk 57.068 no klase 5,6 hamutuk 67.828, nune’e totál 178.406,” Diretór Jerál informa iha ninia knaar fatin, edifísiu MEJD Villa-verde, sesta ne’e.
Notísia relevante: MEJD sei distribui kaderneta eskolár ba estudante 16.000-resin
Maski distribuisaun ramata ona, maibé parte ministériu nafatin hein relatóriu hosi eskola sira iha tinan letivu 2021.
“Liuhosi prosesu asinatura kaderneta mak foin bele hatene estudante sira hetan hotu ou balun seidauk hetan. Se tinan ida-ne’e maka kaderneta la sufisiente, ita sei prepara fali ba tinan 2022 atu rezolve asuntu sira ne’e hodi atinje meta ne’ebé define ona,” nia akresenta.
Jornalista : Tomé Amado
Editora : Julia Chatarina
