BOBONARO, 18 dezembru 2021 (TATOLI)—Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur, sábadu ne’e, ensera atividade ezersisíu Cobra 21-2 ne’ebé hala’o durante semana rua nia laran iha munisípiu Bobonaro.
Notísia Relevante: Ezersísiu Cobra iha Bobonaro orienta forsa familiariza terrenu
“Ha’u nu’udár imi-nia komandante, haree imi-nia treinamentu durante hahú hosi imi-nia komandante to’o prasas iha vontade bo’ot tebes atu serbí instituisaun militár F-FDTL, Estadu Timor-Leste no mós ita-nia povu,” Tenente Jenerál Lere Anan Timur hateten bainhira hato’o nia diskursu iha serimónia enseramentu ba atividade Ezersisíu Cobra 21-2 iha Postu Komandu Damlaran, aldeia Harame, suku Aidaba Leten, postu adminitrativu Bobonaro, Munisípiu Bobonaro.
Tenente Jenerál Lere Anan Timur hatutan, atividade ezersísiu Cobra 21-2 F-FDTL ne’ebé durante ne’e hala’o, atu kapasita komandu iha operasaun tantu iha rai-laran no rai-li’ur.
“Hamutuk ho ita-nia parseiru sira liu-liu Comunidade dos Países da Língua Portuguesa (CPLP) hatudu ba munudu katak Timor-Leste maske kiik maibé hanesan nasaun ho nia forsa armada ne’ebé sei nurak ita mós bele,” nia dehan.
Dever forsa armada ninian la’ós atu garante de’it soberania no la’ós konfia de’it arma ka kilat atu tiru malu ho inimigu, maibé ohin loron inimigu laiha ona, forsa armada nia inimigu bo’ot mak mijeria ka ki’ak, moras no problema ba komunidade nian.
“Ida-ne’e mak problema boot. Ita nu’udár forsa armada responde tuir ita-nia posibilidade ka kbi’it ka buka hakmaan sira-nia todan loro-loron nian. Nune’e ba forsa armada ne’ebé partisipa iha ezersisíu Cobra 21-2 durante semana rua, ha’u hatene katak, imi nu’udár militár imi sente obstaklu no problema sira-ne’ebé imi sempre hasoru,” nia dehan.
Nia hateten ba forsa armada ka militár sira tenke pasiénsia, tenki hatene lori sakrifísiu, respeita no hadomi povu, tanba ida-ne’e mak bele kondisaun aat oinsá mós marka imi-nia an nu’udár sidadaun Timor no marka imi-nia an nu’udár lutu nasaun nian, kuandu nesesáriu imi sei fakar imi-nia raan ba rai no povu ida-ne’e.
“Nu’udár sidadaun no timor-oan, ita-nia misaun rua de’it mak servi Estadu hanesan saida mak agora ita hala’o daudaun ne’e, kuandu fila ba uma servi ita-nia família,” Lere Anan Timur hateten.
Iha biban ne’e, Tenente Jenerál Lere Anan Timur agradese ba médiku militár F-FDTL no pesoál saúde sira-ne’ebé durante ne’e hala’o ezersísiu Cobra 21-2 bele fó asisténsia saúde ba komunidade iha zona remota no sira sente duni asisténsia ka apoiu ne’e hala’o hosi forsa armada.
Notísia Relevante: Ezersísiu Cobra 21-2 prenxe ona padraun internasionál
“Ha’u apresia mós membru F-FDTL Kompañia Enjinária nian bele harii tanke bee-moos ida ba ita-nia komunidade iha Damlara ne’ebé presiza. Apoiu ne’ebé imi fó ba komunidade seidauk to’o, sira sei presiza liután estrada, bee-moos, klínika no eletrisidade,” nia hateten.
Iha serimónia eseramentu ne’e, Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur, halo inagurasaun ba tanke Bee-Moos ne’ebé konstrui hosi membru F-FDTL Kompañia Enjinária sira ba komunidade Damlaran, aldeia Haraeme.
Atividade seluk maka asiste simulasaun rua ne’ebé hatudu hosi membru F-FDTL sira kona-ba primeiru salva VIP hosi asaltu demostrasaun nian no segundu forsa amiga hadau baze inimigu nian.
Notísia Relevante: F-FDTL konstrui tanke bee-moos ba komunidade Harame
Jornalista : Francisco Sony
Editór : Cancio Ximenes
