VIQUEQUE, 20 Dezembru 2021 (TATOLI)-–Diretór Edukasaun munisípiu Viqueque, Emidio Amaral, informa, konstrusaun eskola hamutuk 18 iha Viqueque sei tama faze konstrusaun iha tinan 2022.
“Ita hahú serbisu iha janeiru 2022 no Ministériu Edukasaun Juventude no Desportu (MEJD) aloka ona orsamentu ba konstrusaun eskola 18, ba konta grupu komunitáriu sira,” Diretór Edukasaun hateten ba Agência TATOLI, iha ninia knaar fatin, Viqueque villa, segunda ne’e.
Notísia relevante: Grupu komunitáriu preparadu integra iha konstrusaun eskola 18 iha Viqueque
Daudaun ne’e tékniku sira tuir hela formasaun nu’udar faze preparasaun molok tama faze konstrusaun.
Enkuantu kona-ba dadus eskola, Diretór ne’e ladún iha númeru serteza tanba iha hela tékniku sira, maibé eskola sira ne’ebé tama konstrusaun iha postu Viqueque villa, Ossu, Uatucarbau no Uatulari, ho totál kustu ba konstrusaun $106.874,42.
“Komunidade lokál rasik mak sei direta halo serbisu konstrusaun eskola,” nia akresenta.
Aleinde ne’e, eskola sekundáriu tolu maka tama ona ba konkursu hanesan Eskola 04 setembru Viqueque, Eskola Sekundáriu Tékniku Vokasionál Lacluta no Eskola Sekundáriu Dara-Loi Iraler.
“Eskola hirak ne’e loke konkursu iha nasionál, ne’ebé prosesu agora la’o ona, ita hein dala ruma iha hotu tinan oin,” nia tenik.
Jornalista : Vitorino Lopes da Costa
Editora : Julia Chatarina
