AILEU, 20 dezembru 2021 (TATOLI)—Lia-na’in uma lisan tolu hosi Aileu, Hohulu, Ramansu no Dailor, hala’o serimónia rituál hodi haree manu no fahi nia aten, no karau nia talin atu hatene prosesu antes tama ba serimónia ofisiál lansamentu ba sidade universitária ne’ebé sei realiza iha suku Fahiria, Aileu Vila.
Notísia Relevante: Projetu sidade universitáriu iha Aileu, prevee millaun $1.037,987 ba indemnizasaun
Ministru Ensinu Superiór Siensia no Kultura (MESSK), Longuinhos dos Santos, hateten serimónia rituál ne’ebe hala’o atu lia-na’in sira bele haree manu no fahi nia aten hatudu sinál di’ak. Sinál ladi’ak mak daudaun ne’e sei iha família 29 ne’ebé lakohi koopera ho Governu.
Nia hateten, daudaun ne’e entre família 29 ne’e mós balun hakbesik an ona ba administradór munisípiu Aileu hodi kontribui ba dezenvolvimentu hodi halo munisípiu Aileu sai sidade universitária.
“Hanesan lia-nai’n sira haree manu no fahi nia aten iha serimonia rituál katak sei iha parte balun ne’ebé mak seidauk konkorda ho prosesu ne’e tomak, maibé nia konkluzaun ikus sei di’ak no la’o ho normál hanesan lia-na’in sira esplika ona. Portantu Governu iha kompromisu katak dezenvolvimentu ida-ne’e ba timor-oan tomak, tanba ne’e programa oitavu Governu Konstitusionál nian, hakarak ka lakohi tenke aselera ba oin,” Longuinhos dos Santos ba jornalista sira hafoin serimónia rituál haree fahi nia aten, segunda ne’e.
Governante ne’e afirma, família sira-ne’ebe rai ka hela fatin afetadu ba sidade universitáriu, Governu sei fó indemnizasaun.
“Iha prosesu levantamentu dadus, família afetadu hamutuk 72 no sira-ne’ebé lakohi koopera ho Governu hamutuk família 29. Maibé sira balun hasoru ona administradór munisípiu Aileu, no ba hirak ne’ebé karik la konkorda nafatin bele liuhosi prosesu justisa. Ha’u fiar katak sira hotu sei bele konkorda,” nia dehan.
Entretantu, medida rai ba konstrusaun sidade universitáriu Aileu ne’e hamutuk rai ektare 24 ho plantasaun ai-horis hanesan kafe, nú no ai-horis seluk tan ne’ebé kuda nanis ona iha área refere.
Nia informa, serimónia ofisiál lansamentu sidade universitáriu Aileu sei hala’o iha tersa (21 dezembru 2021) ne’ebé tuir planu sei lansa hosi Primeiru-Ministru, Taur Matan Ruak.
Hirak ne’ebé akompaña serimonia rituál haree animál nia aten ne’e mak MESSK, Longuinhos dos Santos, administradór Munisípiu Aileu, Abel da Conceição, komandante PNTL Aileu, Jorge Monteiro, autoridade lokál, lia-na’in no komunidade Aileu.
Reprezentante Lia-Na’in Dailor, Aileu, Biromoza, hateten buat hotu sei la’o ho di’ak, maibé sei iha mós naksalak balun ne’ebe daudaun ne’e iha maibé sei la fó impaktu ba prosesu konstrusaun.
“Hosi animál rua (2), manu no fahi, lee (haree) ninia aten ne’e fó sinál di’ak hotu, maibé iha sinál uitoan mak sei iha fukun hela hanesan ita hotu hatene maibé neineik sei di’ak,” lia-na’in ne’e hateten.
Notísia Relevante: Governu finaliza levantamentu dadus ba abitante afetadu Sidade Universitáriu Aileu
Jornalista : Argentina Cardoso
Editór : Cancio Ximenes
