iklan

EKONOMIA, INTERNASIONÁL, HEADLINE

Governu Alemaña ofisialmente entrega ró-ahi Berlin-Ramelau ba Timor-Leste

Governu Alemaña ofisialmente entrega ró-ahi Berlin-Ramelau ba Timor-Leste

Ró-ahi Berlin-Ramelau atraka iha Portu Dili, segunda (20/12/2021). Imajen Tatoli/Egas Cristóvão

DILI, 20 dezembru 2021 (TATOLI)–Governu Alemaña ofisialmente entrega ró-ahi Berlin-Ramelau ba Governu Timor-Leste liuhosi Ministériu Transporte no Komunikasaun (MTK), iha segunda ne’e, iha Portu Dili.

Primeiru-Ministru (PM), Taur Matan Ruak, hateten, projetu ne’e sai hanesan prezente boot ida ba populasaun Timór tomak, liuliu ba populasaun Oé-cusse no Ataúro, iha tempu ne’ebé ró ida hakdasak hela (Berlin Nakroma) tanba seidauk konsege halo manutensaun, ne’ebé laiha posibilidade atu halo operasaun.

Primeiru-Ministru, Taur Matan Ruak, halo vizita ba ró-ahi Berlin-Ramelau, iha Portu Dili, segunda (20/12). Imajen TATOLI/Egas Cristóvão

“Tanba ne’e, Ministériu Transporte no Komunikasaun halo esforsu atu garante konetividade entre Oé-cusse-Dili no Ataúro-Dili, ne’ebé durante ne’e enfrenta problema barak. Maibé ida-ne’e akontese tanba iha parseria di’ak ho Governu Alemaña, Autoridade Portuáriu Timor-Leste (APORTIL) no empreza ne’ebé konstroe ró,” Xefe Governu dehan liuhosi diskursu iha ámbitu seremónia hand over ró-ahi Berlin-Ramelau.

Kooperasaun entre parte rua ne’e hanesan projetu daruak, ne’ebé antes ne’e halo ona kooperasaun ba ró dahuluk, Berlin Nakroma iha tinan hirak liubá.

“Ha’u agradese kooperasaun ho Alemaña no enkoraja kooperasaun ida-ne’e permanese. Preparativu dahuluk entre Alemaña ho Timór hahú tinan-10 ba kotuk,” nia akresenta.

Orgullu tanba tripulante timor-oan mak sei kaer ró

Iha biban ne’e, PM Taur sente orgullu tanba MTK no APORTIL tanba prepara timor-oan sira hodi kaer rasik ró.

Primeiru-Ministru, Taur Matan Ruak , hamutuk tribulante sira ba ró-ahi Berlin-Ramelau, iha Portu Dili, segunda (20/12). Imajen TATOLI/Egas Cristóvão

“Ha’u hakarak hato’o saudasaun espesiál ba Ministériu Transporte no Komunikasaun no tripulante timor-oan dahuluk sira, ba ha’u iha esperiénsia harii mariña hosi guirilleiru sira, transforma guirilleiru ba mariñeiru, ha’u la komprende tinan-20 hafoin ita laiha ema atu kaer ita-nia ró rasik, entaun ha’u hakarak hato’o parabéns ba Ministru Transporte no Komunikasaun ba esforsu ida-ne’e. Ha’u lembra iha tinan hirak liubá ha’u levanta kestaun ida-ne’e, difísil liu mak transforma guirilleiru ba mariñeiru. Agora mariñeiru ba mariñeiru ne’e fasil liu no ita iha,” PM dehan.

Notísia relevante:APORTIL hahú prepara tripulante timor-oan na’in-14 utiliza ró-ahi Berlin-Ramelau

Nune’e, Xefe Ezekutivu espera, tinan hirak mai oin totalmente timor-oan mak kaer ró-ahi rua ne’e.

Primeiru-Ministru, Taur Matan Ruak no Ministru Transporte no Komunikasaun, José Agustinho da Silva, entrega souvenir ró-ahi Berlin Ramelau ba Responsável Governu Alemaña, iha Portu Dili, segunda (20/12). Imajen TATOLI/Egas Cristóvão

“Ne’e hanesan orgullu, determinasaun, no vontade atu avansa ba oin, muda no adapta-an ba dezenvolvimentu ita-nia rain rasik,” nia tenik.

Nune’e, Eis Prezidente Repúblika husu ba tripulante sira atu kuidadu didi’ak ró foun ne’e, nune’e bele dura to’o tempu naruk.

“Ha’u husu ba tripulante atu kuidadu ró Berlin-Ramelau, halo ligasaun sidade Berlin ho foho Ramelau, ne’ebé hanesan símbolu ita-nia rain no foho ida a’as liu iha ita-nia rain. Entaun tenke kuidadu didi’ak, nune’e bele dura no kontinua nafatin iha kondisaun atu serví ita-nia sidadaun-sira liuliu sidadaun Oé-cusse no Ataúro ne’ebé presiza tebes,” Xefe Governu apela.

Reprezentante Governu Alemaña, Rainer Schellhaas. Imajen TATOLI/Egas Cristóvão

Iha biban hanesan, Reprezentante Governu Alemaña, Rainer Schellhaas, hateten, kooperasaun entre Timor-Leste no Alemaña la’o ona durante tinan barak nia laran iha setór oin-oin, ne’ebé Berlin-Ramelau la’ós de’it sinál kooperasaun entre nasaun rua maibé ida-ne’e hatudu amizade globál nian.

Notísia relevante: Ró Berlin-Ramelau to’o iha Timor-Leste

Governu rua finansia prosesu kontrusaun ne’ebé hala’o iha Xina maski durante ne’e hasoru dezafiu barak durante pandemia COVID-19 no iha situasaun Estadu Emerjensia maibé liu husi servisu maka’as APORTIL nian no Governu ohin loron bele finaliza ho di’ak.

“Hau apresia ba ema hotu ne’ebé hola parte iha prosesu ida-ne’e. Agora daudaun fim do ano, ema barak hakarak halo viajen ba nia knua hare’e família no prezensa Berlin-Ramelau bele hatan ba mehi ida-ne’e. Ha’u espera imi hotu ne’ebé sei halo viajen bele la’o diak uza Berlin Ramelau,” Rainer Schellhaas dehan.

Primeiru-Ministru, Taur Matan Ruak no Reprezentante Governu Alemaña, Rainer Schellhaas. Imajen TATOLI/Egas Cristóvão

Biban ne’e, Ministru Transporte no Komunikasaun, José Agustinho da Silva, aprezenta mós tripulante timor-oan na’in-13 ne’ebé sei servisu ba iha ró. Nune’e mós hatun Bandeira St. Vincent Grenading no hasa’e fali Bendeira RDTL nian.

Enkuantu, iha loron 31 maiu 2019, Governu Timor-Leste reprezenta hosi Ministru Transporte no Komunikasaun, asina akordu ho Governu Federál Alemaña no Kompañia Estaleiru Navál ‘Damen’ hodi halo konstrusaun Ró Berlim-Ramelau.

Projetu ne’e Governu Alemaña kontribui millaun €7,8 no Timor-Leste millaun €7,1.

Jornalista : Antónia Gusmão

Editora      : Julia Chatarina

iklan
iklan

Leave a Reply

iklan
error: Content is protected !!