DILI, 20 dezembru 2021 (TATOLI)— Vise Primeiru Ministru no Ministru Planu no Ordenamentu (MPO), José Maria dos Reis hamutuk ho ekipa tékniku hahú halo aprezentasaun estrutura prosesu reajustamentu Planu Estratéjiku Dezenvolvimentu (PED) 2011-2030 ba Parlamentu Nasionál.
“Ha’u ho ekipa tékniku mai aprezenta estrutura reajustamentu PED ba Prezidente Parlamentu Nasionál no Prezidente Bankada-sira,” Ministru José Reis, hateten ba Jornalista sira iha Parlamentu Nasionál, Dili, segunda ne’e.
Notísia Relevante: Reajustamentu PED 2011-2030 hodi adapta realidade ohin loron
Tanba, VIII Governu Konstitusionál haree katak iha nesesidade atu reajusta planu estratéjiku hodi responde di’ak liután ba nesesidade atuál no risku future sira, ne’ebé deside liuhosi rezolusaun númeru 81/2021,21 juñu atu harii komisaun interministeriál ba reajustamentu PED 2011-2030.
Nune’e, Governante ne’e informa, halo ona konsultasaun ho Prezidente Repúblika, Amo Bispu sira no autoridade munisipál sira.
“Tinan oin, ami sei tuun fali ba munisípiu hotu, tanba ita hanoin katak planu dezenvolvimentu ne’e importante tebes. Tanba ne’e ami halo konsultasaun ida ba sosiadade tomak no sei la’o tuir munisipiu hotu atu husu opiniaun sira nian kona ba oinsá maka ita bele la’o ba oin,” Vise PM ne’e akresenta.
PED tinan 2011-2030 ho objetivu atu hasa’e nasaun ba kategoria médiu-altu ho populasaun ne’ebé hakmatek no saudável, kreximentu ekonómiku no sosiál ne’ebé inkluziva no sustentavél, liuosi implementasaun faze tolu, hanesan tempu badak to’o tinan 2015, médiu to’o tinan 2020 no tempu narauk to’o tinan 2030.
“Maibé, tinan 20 Timor-Leste hetan independénsia ho instrumentu rua importante hanesan Planu Dezenvolvimentu Nasional 2002 -2020 no Planu Estratéjiku Dezenvolvimentu 2011-2030, maibe ita nian povu mós kontinua halerik nafatin problema. Tanba ne’e mak to’o ona tempu atu ita halo avaliasaun ida,” Governante ne’e afirma.
Kona-ba planu ordenamentu territóriu, Ezekutivu ne’e afirma hala’o hela diskusaun tanba hanesan instrument importante ba apoia prosesu dezenvolvimentu nasionál.
“Agora ami diskute hela, ha’u hanoin tinan oin mai bele finaliza ona. Tanba ida ne’e kontinuasaun ne’ebé halo ona iha Governu anterior. Ami tenta atu finaliza estudu liuliu estudu ba ordenamentu munisipál no estudu ordenamentu urbanu Dili nian,” nia akresenta.
Notísia Relevante: MPO no autoridade munisipál diskute prosesu reajustamentu PED 2011-2030
Jornalista : Natalino Costa
Editór : Florencio Miranda Ximenes
