VIQUEQUE, 21 dezembru 2021 (TATOLI)–Komisaun Nasionál Eleitorál (CNE, sigla portugés) munisípiu Viqueque fó teste ba kandidatu ofisiál supervizaun eleitorál hamutuk na’in-310, ba vaga 107 hodi destaka iha sentru votasaun iha Eleisaun Prezidensiál iha marsu 2022.
“Rekrutamentu ofisiál supervizaun eleisaun, ho objetivu prinsipál atu prepara ema atu tau-matan ba sentru no estasaun votasaun iha territóriu Timor-Leste inklui munisípiu Viqueque mós prepara ninia ema. Tanba ne’e, ohin ami fó teste ba kanditu hamutuk 310,” Komisáriu CNE, Olávio da Costa Monteiro Almeida, hateten ba Agência TATOLI, iha Eskola 01 Pre-sekundáriu, Beloi, tersa ne’e.
Notísia relevante: CNE kontinua edukasaun sívika ba estudante 04 setembru Viqueque
Kandidatu ofisiál supervizaun eleitorál sira prepara ba Eleisaun Prezidensiál, maibé iha posibilidade pesoál hirak ne’e mak sei tau-matan ba Eleisaun Parlamentar iha tinan-2023.
“Ita sei haree prosesu rekrutamentu agora, bainhira ita haree di’ak no la mosu problema maka ita haree ba oin bele mantein sira, do que ita halo tan rekrutamentu ne’e presiza mobiliza rekursu. Tanba ne’e, posibilidade sira ne’e bele mantein,” nia akresenta.
Kandidatu sira tuir teste iha sala-10, ne’ebé kada sala iha ema na’in-30, nune’e totál kandidatu 310.
Iha fatin hanesan, Diretór CNE Viqueque, Honorio Cruz da Silva, hateten, iha munisípiu parte leste ne’e, antes ne’e iha kadidatu hamutuk na’in-351 mak atu konkorre iha vaga, maibé iha prosesu selesaun dokumentu iha na’in-41 maka la pasa.
“Ohin, ami fó ona teste ba kandidatu sira, nune’e hahú loron 22 to’o 23 dezembru ekipa sei halo korresaun ba matéria ezame, hafoin anunsiu rezultadu iha loron 27 dezembru no tuir planu kandidatu ne’ebé liu teste eskrita sei halo entrevista iha loron 05 to’o 07 janeiru 2022. Atu liu vaga, kandidatu sira tenke hetan valór mínimu 60, maibé ita sei halo ezersísiu tanba iha suku balun ema mai hotu,” Diretór CNE informa.
Kandidatu ba ofisiál supervizaun eleitorál serbisu ho durasaun fulan-tolu, hahú fevereiru to’o abríl 2022.
Teste eskrita ne’e hahú tuku 9:00 dadeer no ramata iha tuku 10:45, ne’ebé CNE ho apoiu hosi ekipa Sekretaria Estadu Formasaun Profisionál no Empregu (SEFOPE) mak sai vijilante ba teste ne’e.
Jornalista : Vitorino Lopes da Costa
Editora : Julia Chatarina
