DILI, 21 dezembru 2021 (TATOLI)– Sekretária Estadu Juventude no Desportu (SEJD), Abrão Saldanha, informa, daudaun ne’e progresu konstrusaun faze daruak Estádiu Munisipál Manatuto, atinje ona 83%.
“Daudaun, progresu konstrusaun ba Estádiu Manatuto atinje 83%, tuir verifikasaun hosi Agência Dezenvolvimentu Nasionál (ADN) no sira halo aseita ba presu estensaun tan kontratu ho kompaña atu obra ne’e bele finaliza iha tinan oin,” SEJD Abrão hateten Agência TATOLI iha edifísiu, Licidere-Dili, tersa ne’e.
Notísia Relevante: Estádiu Manatuto Kontinua Paradu Tanba Kompañia la Hakbesik ba SEJD
Daudaun, progresu atinje 83% tanba kompañia atu finaliza monta kadeira, reabilita moru, du’ut mós komesa hahú kuda ona.
“Buat hotu remata ona, hela oituan de’it mak ita bele finaliza hanesan duut agora kompaña buka foun la’ós uza ona ida uluk ne’e, maibé buka duut ne’ebé bele moris iha rai masin, agora bee mak araska tanba baku dala hira ona la hetan bee, maibé kompaña esforsu nafatin,” nia akresenta.
Nune’e, Governante ne’e iha konfiansa tomak obra ne’e kompañia sei finaliza iha fulan-klaran 2022.
Estádiu ne’e konstroi hosi kompaña lokál Obrai Unipesoál Lda ho orsamentu Estadu ne’ebé prevee hosi fundu infraestrutura ho valór milaun $2, ne’ebé Governu konsege selu ona 60%, maibé seidauk termina kompañia abandona iha 2016 liu-ba.
Tanba, haree laiha progresu Governu deside hapara kompañia nia atividade, maibé iha 2017 to’o 2018 kompaña iha mudansa ba estrutura no Governu fó nafatin konfiansa ba kompañia atu kontinua obra to’o ohin loron.
Tuir kontratu foun ne’ebé Governu halo ho kompañia ho osan restu ne’ebé sei iha no adisionál hamutuk $600.000 mak fó ba kompañia hodi kontinua obra ne’e.
Notísia Relevante: Obrai Kontinua Kaer Obra Estádiu Manatuto
Jornalista : Hortencio Sanchez
Editór : Florencio Miranda Ximenes
