DILI, 22 dezembru 2021 (TATOLI)–Universidade Nasionál Timor-Lorosa’e (UNTL) hein hela rezultadu omologasaun hosi Ministru Ensinu Superiór Siénsia no Kultura (MESSK), Longuinhos dos Santos, atubele realiza seremónia graduasaun ba estudante finalista 642 iha loron 27 dezembru tinan ne’e.
Tuir Vise-Reitór UNTL ne’ebé trata asuntu Akadémiku no Garantia Kualidade, Samuel de Sousa Venâncio Freitas, dadus estudante haruka ona ba ministériu atu halo omologasaun, maibé to’o agora parte universidade seidauk simu fali informasaun.
“Loloos ita-nia ministériu bele haruka ona rezultadu mai atu ita bele halo preparasaun, tanba agora tama ona loron 22 dezembru, sei kleur liu bele adia fali ba tinan oin, maibé presiza despaixu foun fali,” Vise-Reitór UNTL relata Agência TATOLI, iha Kampus UNTL, kuarta ne’e.
Notísia relevante: Universidade tolu submete lista graduasaun 2.101 ba MESSK
Ba kestaun ne’e, parte universidade hein karta omologasaun tun sedu, nune’e bainhira iha buat ruma presiza hadi’a, sei iha tempu atubele aselera prosesu, maibé bainhira rezultadu omologasaun fó sai lista iha loron 24 dezembru ba leten maka sei difikulta prosesu graduasaun ba estudante sira iha tinan ne’e.
Iha sorin seluk, Ministru Ensinu Superiór Siénsia no Kultura, Longuinhos dos Santos, relata katak to’o agora nia seidauk simu lista estudante finalista UNTL ne’ebé atu gradua iha tinan ne’e.
“Ha’u simu ona lista Universidade Dili (UNDIL), Universidade Orientál Timor-Lorosa’e (UNITAL), Universidade da Paz (UNPAZ) no manda ona despaixu ba sira atu fó lisensa ba graduasaun, maibé UNTL seidauk simu, maski ha’u hetan informasaun katak UNTL mós atu halo graduasaun iha fulan-dezembru, maibé ha’u seidauk simu karta formál ida hosi sira,” governante ne’e dehan.
Jornalista : Tomé Amado
Editora : Julia Chatarina
