VIQUEQUE, 22 dezembru 2021 (TATOLI)—Progresu fíziku konstrusaun morru haleu administrasaun munisípiu Viqueque atinje ona 40% no jardín 59 atinji ona 45,69%, ne’ebé ninia durasaun serbisu tama ona fulan-tolu.
“Hosi progresu fíziku konstrusaun morru tama ona pondasi, cinta no hada sae ona batako no jardín 59 iha faze pondasi, cinta hada batako, no pagar hotu ona. Empreza rua relata progresu ba Planu Integradu Dezenvolvimentu Munisípiu (PIDM) hodi submete ba Ajénsia Dezenvolvimentu Nasionál (ADN) hodi halo validasaun, nune’e autoridade valida jardín 59 progresu 36,10% no morru valida ba 36,18%,” Diretór PIDM, Domingos de Carvalho, informa ba Agência TATOLI, iha ninia knaar fatin, kuarta ne’e.
Notísia relevante: Progresu konstrusaun jardín 59 Viqueque atinje 30%
“Empreza rua hahú konstrusaun morru no jardín iha loron 15 setembru, ne’ebé agora tama dezembru halo fulan-tolu serbisu, maibé ita haree seidauk atinje 50%, loloos ne’e atinje ona,” nia akresenta.
Tuir kontratu durasaun serbisu fulan-neen ba projetu rua, maibé agora progresu seidauk atinje progresu 50%.
“Signifika hatudu dívida empreza rua tanba labele foti hotu orsamentu iha tinan 2021,” nia akresenta.
Mobilizasaun materiál konstrusaun la’o hela, ne’ebé PIDM halo ona pagamentu faze dahuluk ba empreza.
Iha pagamentu dahuluk ba empreza Darda G.M Unipesoal Lda hamutuk $36.667,22 no Peaceful, Unipesoal LDA hamutuk $43.962,43, enkuantu totál orsamentu ba konstrusaun morru hamutuk $233.346,66 no jardín 59 orsamentu hamutuk $273.301,49.
“Projetu morru no jardín ho kategória B ne’ebé tama orsamentu ba adiantamentu 51% ba konstrusaun. Hosi pagamentu ne’e, ita haree progresu hahú aumenta ba oin, nune’e ami nafatin orienta ampreza halo konstrusaun no la’o tuir Bill of Quantity (BoQ) atu garante kualidade projetu,” nia subliña.
Loron finalizasaun ba konstrusaun morru no jardín 59 iha loron 28 fevereiru 2022.
Jornalista : Vitorino Lopes da Costa
Editora : Julia Chatarina
