VIQUEQUE, 10 novembru 2021 (TATOLI)—Ministériu Turizmu, Komérsiu no Indústria (MTKI) realiza semináriu, kinta ne’e, hodi konvida grupu agrikultór Viqueque hodi motiva no fó hanoin atu hasa’e produsaun agríkola iha rai-laran.
“Se ita lakoi hasa’e produsaun agríkola, ita sei nafatin dependente ba ai-han sira hosi importasaun. Tanba rezultadu hatudu ona foin lalais Governu kria programa Cesta Bázika hodi fó prioridade ba produtu lokál, maibé produtu lokál mak la sufisiente,” Diretór Jeral Komérsiu MTKI, Cosme Fátima Baptista da Silva, hatete, iha ámbitu semináriu, iha postu Uatulari, munisípiu Viqueque.
Eventu ne’e ho tema ‘Hasa’e exportasaun atu hamenus fazeadamente dezekilíbriu balansa komersiál bazeadu ba kapasidade aumenta produsaun nasionál iha Timor-Leste’, ne’ebé biban ne’e envolve liña ministeriál sira hodi fó informasaun nesesáriu ba komunidade no autoridade sira
Objetivu atividade ne’e atu motiva komunidade agrikultór hasa’e produsaun no ekonomia uma-laran.
“Ha’u husu komunidade agrikultór sira halo esforsu liután hodi hasa’e produsaun lokál hodi kompete ba merkadu nasionál hodi hetan reziliénsia ekonomia lokál no nasionál,” nia akresenta.
Iha fatin hanesan, Administradór postu Uatulari, Manuel do Rosário agradese ba MTKI ne’ebé realiza ona semináriu.
Seminariu ne’e partisipa hosi komunidade no autoridade lokál no grupu agrikultór sira iha postu Uatulari.
Jornalista : Vitorino Lopes da Costa
Editora : Julia Chatarina
