DILI, 26 dezembru 2021 (TATOLI)–Suspeitu kazu omisídiu iha Liquiçá, daudaun ne’e detein ona iha sela Komandu Polísia Nasionál Timor-Leste (PNTL) munisípiu Liquiçá hodi hein submete ba prosesu legál.
“Suspeitu ho inisiál ZMF ne’ebé oho nia kaben no hakanek nia oan na’in-rua iha aldeia Vatubou, munisípiu Liquiçá, daudaun ne’e detein ona iha sela Komandu PNTL Liquiçá durante oras 72 hodi hein submete ba primeira interrogatóriu iha Tribunál Distritál Dili,” Komadante PNTL munisípiu Liquiçá, Superintidente Umbelina dos Santos, informa ba Agência TATOLI, via telefónika, domingu ne’e.
Komadante esplika, kazu ne’e akontese tanba mosu dezentendimentu entre fen-laen no sira-nia família.
“Kazu akontese maizumenus tuku 09:00 dadeer, iha loron sabadu (25/12) horiseik tanba de’it dezentendimentu. Tuir suspeitu, nia kaben hato’o informasaun hosi família sira ladún klaru, entaun suspeitu nervosu no halo asaun hasoru nia-fen ho oan, to’o nia fen hakotu iis iha fatin no agora nia oan na’in-rua ho kondisaun grave, ne’ebé lori ona ba Hospitál Nasional Guido Valadares hodi hetan atendimentu intensivu,” Komadante munisipál haktuir.
Daudaun ne’e, ekipa responsável kontinua rekolla tan informasaun no evidénsia balun tan iha terrenu.
Jornalista : Natalino Costa
Editora : Julia Chatarina
