BOBONARO, 28 dezembru 2021 (TATOLI) – Agrikultór natar iha área Soso pertense ba suku Tapo-Memo, Holsa no suku Odomau, postu administrativu Maliana, munisípiu Bobonaro hahú halai natar époka dahuluk tinan 2021 nian.
Agrikultór Diamantino de Jesus, hateten, fulan-dezembru tinan 2021 ne’e volume udan-been di’ak halo bee nakonu no sulin ba natar laran.
“Semana kotuk ne’e ami komesa ona hoban hare, agora ohin ami mai butuk aproveita fila kedas rai, nune’e 27 janeiru tinan oin komesa fukit ona hare, fulan-janeiru nia rohan ne’e bele kuda ona tanba udan-been iha natar laran nakonu loos,” nia informa ba Agência Tatoli, iha Soso, Maliana, segunda ne’e.
Enkuantu daudaun ne’e agrikultór idak-idak hahú lori ona tratór fila-ria, maibé tratór refere aluga de’it, tanba tratór ne’ebé Governu fasilita labele kobre agrikultór sira-nia natar.
Nia haktuir, iha tinan kotuk udan-been ladún fornese bee ba natar ho di’ak, maibé tinan ne’e sufisiente bele garante kolleta iha fulan-marsu no abríl 2022 ho kuantidade produsaun hare sa’e.
“Uluk ne’e bee laiha, nago mós barak hán hare sira-ne’e kotu hotu kedas, entaun ami kolleta hetan de’it karon mutin kiik ne’e hamutuk 30, maibé agora udan-been di’ak hanesan ne’e, ami fiar katak bele to’o karon 50 hanesan ne’e tanba natar ne’e tinan ida ami halo dala ida de’it,” nia katak.
Enkuantu agrikultór Eusebio dos Santos, reforsa, kada tinan rezultadu hosi produsaun ne’e utiliza de’it ba han, tanba kestaun irrigasaun labele fornese bee ba natar tomak, nune’e agrikultur sira la konsege kontinua halo produsaun iha époka daruak nian.
“Irrigasaun Maliana II ne’e mak aat hotu ona tanba kleur liu tiha, nune’e tinan ida ami halo dala-ida de’it, maibé tuir ami-nia hare ida-ne’e mak governu tau prioridade hadi’a, ha’u hanoin ema hotu-hotu badinas halo natar, bele halo modo no kuda ai-fuan sira seluk, tanba rai ida ne’e bokur depois nia rezultadu mós di’ak,” nia afirma.
Notisia relevante: Lú Olo triste haree natar Maliana nakonu ho fatuk no rai-henek
Jornalista : Sérgio da Cruz
Editór : Evaristo Soares Martins
