BAUCAU, 28 dezembru 2021 (TATOLI) – Governu liuhosi Sekretaria Estadu Protesaun Sivíl (SEPS) hamutuk ho servisu munisipál protesaun sivíl no dezastre naturál Baucau apoia ona materiál konstrusaun ba vítima dezastre naturál iha suku Bucoli, postu administrativu Baucau Vila, munisípiu Baucau.
Diretór Servisu Munisipál Protesaun Sivíl no Dezastre Naturál Munisípiu Baucau, Nelson Abílio Soares Nunes, hateten, hosi rezultadu reverifikasaun uma aat totál hamutuk 13, aat-natoon 19 no aat-kmaan 22.
Materiál konstrusaun ne’e SEPS liuhosi diretór jeral protesaun sivil no diresaun dezastre naturál hamutuk ho autoridade Munisípiu Baucau apoia ona iha loron 27 dezembru.
“Materiál rekuperasaun konstrusaun ba vítima dezastre iha Bucoli hamutuk uma 54 inklui uma haat ne’ebé antes ne’e hetan inséndiu,” nia informa.
Apoia ne’ebé Governu fó la’ós indemnizasaun maibé hanesan parte sentidu solidaridade hosi Governu ba vítima sira-ne’ebé uma hetan estragus kauza hosi anin boot ne’ebé akontese iha loron tersa, 21 dezembru liubá.
Materiál rekuperasaun komposta hosi sasán konstrusaun ba klasifikasaun aat totál hanesan kalen hamutuk 50, semente 29, besi mili 10 hamutuk 12 no mili 8 hamutuk 10.
Nune’e mós perigu kalen kilograma 2, pergu ai 7 cm kilograma 4 no 10 cm kilograma 2, 12 cm kilograma 2 no arame kesi besi inklui osan mão de obra $368.
“Apoia ba aat natoon osan mão de obra $368, enkuantu la inklui semente no besi, aat kmaan la inklui semente, besi no pregu ai maibé simu kalen hamutuk 50, pregu kalen inklui osan mão de obra hamutuk $150,” Nelson akresenta.
Alende ne’e, parte portesaun sivíl no dezastre naturál mós sei kompleta tán apoia emerjénsia ba vítima uma-kain hamutuk 13 ne’ebé antes ne’e seidauk hetan apoia hanesan nesesidade bázika inklui sasán dapur.
“Natál mós ami halo verifikasaun, liu loron tolu de’it ita resposta kedas, servisu ne’ebé koordenasaun di’ak entre SEPS, Ministériu Interiór no autoridade munisípiu no autoridade suku intermu fornesimentu dadus,” Nelson argumenta.
Komunidade aldeia Luliheni, Hilário Gonçalves Soares Belo, agradese ba Governu liuhos apoia matérial konstrusaun tanba hakmaAn ona todan ne’ebé hetan hafoin akontesImento dezastre naturál iha suku Bucoli.
Notisia relevante: Edukasaun Baucau hahú rekolla dadus EBF Bucoli
Jornalista : Natalino Belo
Editór : Evaresto Soares Martins
