DILI, 28 dezembru 2021 (TATOLI)–Universidade Nasionál Timor-Lorosa’e (UNTL) seidauk deside seremónia graduasaun ba profesór baxarelatu na’in-2.000 resin hosi Instituto Nacional de Formação de Docentes e Profissionais da Educação de Timor-Leste (INFORDEPE), tanba sei diskute hela kona-ba atributu.
Reitór UNTL, João Soares Martins, hateten, ba kestaun ne’e parte rua presiza hetan konkordánsia.
“Ita presiza tuur hamutuk lai atu diskute asuntu importante ne’e, tanba atribuisaun ne’e importante duni ba graduadu sira,” Reitór João Soares informa iha kampus sentrál UNTL, tersa ne’e.
Notísia relevante: UNTL apoiu INFORDEPE atu kumpre lei baze edukasaun ba profesór-sira
Nune’e mós, Vise-Reitór UNTL ne’ebé trata asuntu akadémiku no garantia kualidade, Samuel Venâncio de Sousa Freitas, dehan, prosesu atu halo graduasaun ne’e la problema, maibé atributu tenke deside ho klaru.
“Daudaun ita tuur hamutuk hela hodi diskute atu hetan solusaun, nune’e graduadu INFORDEPE bele uza iha seremónia graduasaun, tanba sira ninia estatutu ne’e diferente ho estudante UNTL ne’ebé tuir teste,” nia akresenta.
Profesór baxarelatu hamutuk na’in-2.000 resin hosi ensinu báziku, ne’ebé INFORDPE integra ba UNTL, bazeia ba akordu kooperasaun.
“Antes ne’e, sira finaliza ona estudu iha UNTL no agora hein de’it atu gradua. Téknikamente UNTL ho INFORDEPE presiza haree hamutuk asuntu ne’e, kuandu loos ona mak bele deside loron graduasaun ba sira,” nia tenik.
Jornalista : Tomé Amado
Editora : Julia Chatarina
