EKONOMIA, HEADLINE, IMAJEN, INKLUZAUN SOSIÁL, MUNISÍPIU, OÉ-CUSSE (RAEOA)

RAEOA-AFMEF selebra kontratu dezenvolve grupu feto 34 

RAEOA-AFMEF selebra kontratu dezenvolve grupu feto 34 

Autoridade RAEO-ASMEF selebra kontratu dezenvolve inisiativa grupu feto 34. Imajen Tatoli/Abílio Elo Nini.

OÉ-CUSSE, 28 dezembru 2021 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), hamutuk ho Asosiasaun Feto Mudansa Ekonomia Família (AFMEF), selebra termu entrega apoia fundu ho valór rihun $94 ba grupu benefisiáriu feto 34, atu dezenvolve inisiativa feto sira-nia kreatividade iha territóriu Oé-Cusse.

Programa ne’e apoia másima hosi autoridade RAEOA liuhosi Gabinete Prezidente Autoridade ba Servisu Promosaun Igualdade no Inkluzaun Sosiál, ho programa empoderamentu ekonomia feto hodi promove talentu inisiativa inan-feto sira atu dezenvolve talentu feto nian iha setór oinoin.

Iha inisíu, Servisu Promosaun Igualdade no Inkluzaun Sosiál simu grupu 48 mak submete sira-nia proposta, maibé liuhosi prosesu avaliasaun sira avalia hetan grupu 34 mak prenxe kritéria sai grupu benefisiáriu ba tinan 2022.

Nune’e, Prezidente Autoridade RAEOA, Arsénio Paixão Bano, informa, selebrasaun ne’e hanesan baze legál ida, nu’udar matadalan ba grupu feto sira atu implementa inisiativa feto sira-nian, nune’e programa bele la’o ho kualidade no susesu ba Oé-Cusse iha futuru.

Tanba autoridade apoia fundu ne’e nu’udar fundu rotativa, kada grupu hetan rihun $5 hodi jere durante tinan ida, nia funan hela iha grupu no nia fundu entrega ba grupu seluk hodi dezenvolve tán sira-nia atividade.

“Ha’u kontente ba esforsu tomak hosi inan feto sira-nia programa, hamutuk ho Asosiasaun Feto Mudansa Ekonomia Família no ekipa Servisu Promosaun Igualdade no Inkluzaun Sosiál, autoridade apoiu sira atu promove grupu feto Oé-Cusse hodi konstribui ba dezenvolveimentu iha setór oinoin,” Arsénio Paixão, ko’alia iha ámbitu selebrasaun asina termu entrega iha salaun Dominícana Oé-Cusse, kinta semana kotuk.

Ezekutivu ne’e fó sai katak, Asosiasaun Feto Mudansa Ekonómia Família no ekipa Servisu Promosaun Igualdade no Inkluzaun Sosiál, sei servisu hamutuk ho grupu benefisiáriu 34, atu observa atividade tomak.

Nune’e bele garante sustentabilidade, tanba esperánsa autoridade tinan ne’e hahú finánsia grupu feto sira presiza servisu maka’as atu atinje nia susesu, nune’e hatudu ezemplo ba grupu seluk tantu iha Oé-Cusse nasionál inklui internasionál.

“Sé imi haree imi-nia grupu no imi-nia programa susesu, jerasaun mai sei konta imi-nia susesu ne’e, hodi adota ba jerasaun tuir mai, ita tenke kontente tanba la hotu-hotu hetan oportunidade ne’e, munisípiu seluk seidauk hetan apoiu hanesan ita, tán ne’e uza didi’ak oportunidade ne’e, hatudu imi feto sira-nia talentu ho kbiit tomak, tanba autoridade sei kontinua oberva to’o baze, haree imi-nia atividade ne’e susesu ka lae,” nia fó hanoin.

Koordenadór Asosiasaun Feto Mudánsa Ekonómia Família, Joana Bobo Tanu, agradese ba autoridade RAEOA, tanba tinan ne’e hahú finansia feto potensiál sira hodi promove kreatividade inisiativa feto sira iha Oe-Cusse.

Entretantu, ekipa avaliasaun ne’e mai hosi reprezentante membru autoridade, sosiedade sivíl inklui Asosiasaun Feto Mudánsa Ekonómia Família. No grupu 34 ne’e mai hosi reprezenta suku 18.

Fonte finansiamentu ba programa empoderamentu ekonomia ne’e mai hosi fundu subvensaun ka fundu transferénsia públiku hosi RAEOA, ne’ebé autoridade aloka hamutuk rihun $94, nune’e kada grupu komposta ema na’in-10 iha direitu hetan fundu rihun $5 hodi jere durante tinan ida nu’udar fundu rotativa.

Nune’e tuir dokumentu ne’ebé Agência Tatoli asesu, selebrasaun kontratu ne’e ho durasaun tinan ida, hahú hosi 23 dezembru 2021 to’o 23 dezembru 2022.

Notisia relevante: RAEOA apoia rihun $94 ba Feto Mudansa Ekonomia Família

Jornalista         : Abílio Elo Nini
Editór               : Evaristo Soares Martins

iklan
iklan

Leave a Reply

iklan
error: Content is protected !!