LIQUICA,28 dezembru 2021 (TATOLI)— Servisu Autónomu Medikamentu no Ekipamentu Saúde (SAMES), tersa ne’e, halo destroisaun ba aimoruk ne’ebé liu prazu iha armazein hamutuk item 207 iha lixu fatin Tibar, munisípiu Liquiça.
“Aimoruk item ne’ebé mak SAMES destroi hamutuk 207 inklui mós iha vasina AstraZeneca ne’ebé liu prazu iha armazein hamutuk 4.510 iha Tibar. Tanba kada tinan ami tenke halo atividade destroisaun ba medikamentu balun, ne’ebé la konsege utiliza iha tinan ida nia laran,” Diretór Ezekutivu SAMES, Santana Martins, hateten, ba jornalista sira iha lixu fatin Tibar-Liquiça.
Diretór Ezekutivu ne’e informa, tinan ne’e iha item aimoruk hamutuk 207 mak la konsege utiliza hotu, hanesan reajente ba laboratóriu iha item rua no item médikamentu konsumuvél hamutuk 26.
Hosi item 207 ne’ebé la konsege utiliza hotu ne’e kalkula ba orsamentu hamutuk $89,975,1, kompostu Orsamentu Jerál Estadu ho montante $710,713.92 ho 87,75%, fundu globál nian 10.28%, UNICEF ho 1,69%, UNFPA 0,28% no hosi OMS ho 0,01%
“Tuir indikadór ami-nia katak aimoruk ne’ebé mak prazu liu katak labele ultrapasa 5%, maibé iha tinan ida iha situasaun COVID-19 halo tratamentu iha fasilidade saúde sira ladun iha entaun fó efeitu ba iha aimoruk liu prazu sa’e ba 9%. Nune’e, ita halo destroisaun hamutuk ho medikamentu konsumuvél ne’ebé aat tanba kauza inudasaun iha 4 abríl,” nia akresenta.
Jornalista : Felicidade Ximenes
Editór : Florencio Miranda Ximenes
