DILI, 29 dezembru 2021 (TATOLI)-–Ministériu Finansa (MF) liuhosi Sekretariadu Tékniku Fundu COVID-19, kontinua halo pagamentu suplementu remuneratóriu ba ekipa liña frente Polísia Nasionál Timor-Leste (PNTL) no pesoál saúde, ba períodu marsu to’o abríl 2021, ho montante totál millaun $11,4.
Pagamentu suplementu remuneratóriu liña frente ba pesoál saúde kobre Servisu Saúde Munisipál iha Aileu, Ainaro, Bobonaro, Ermera, Liquiçá, Manatuto no Manufahi, inklui pilár rua, ne’ebé pagamentu ne’e kobre períodu janeiru to’o setembru 2021.
“Nune’e, informa mós ba públiku katak prosesu transferénsia osan ba benefisiáriu nia konta bankária presiza tempu másimu loron-tolu,” refere nota ne’ebé Agência TATOLI asesu, kuarta ne’e.
Notísia relevante: MF realiza tan pagamentu suplementu remuneratóriu ba liña frente MS
Antes ne’e, MF realiza ona pagamentu suplementu remuneratóriu liña frente ba pesoál saúde hamutuk na’in-5.722, ho montante totál millaun $18,3.
Antes ne’e, Prezidente Repúblika, Francisco Guterres ‘Lú Olo’, promulga ona altersaun daruak ba Dekretu-Lei Suplementu Remunetrátoriu ba liña frente ne’ebé halo atividade profisionál iha situasaun pandemia COVID-19, ne’ebé pagamentu hahú iha marsu to’o dezembru 2021 no bainhira Orsamentu Jerál Estadu (OJE) 2021 ramata, presiza hatutan suplementu ne’e ba tinan 2022, ne’ebé presiza iha fali Dekretu-Lei foun ida.
Dekretu-Lei kona-ba Suplementu Remuneratóriu define profisionál elejível ba direitu hetan direitu mak médiku, efermeiru, auxiliár ba asaun médika, parteiru sira, téniku análiza laboratóriu, tékniku saúde públika, tékniku radiolojia, sira-ne’ebé ezerse funsaun iha Sala Situasaun, Sentru Integradu Jestaun Krize (CIGC, sigla portugés), motorista veíkulu, responsável sira-ne’ebé lori ema ba izolamentu obrigatóriu, elementu PNTL no FALINTIL-Forsa Defeza Timor-Leste (F-FDTL) ne’ebé envolve iha prevensaun no kontrolu COVID-19.
Nune’e mós, traballadór sira iha Autoridade de Inspesaun no Fiskalizasaun Atividade Ekonómika, Sanitária no Alimentar (AIFAESA), Diresaun Nasionál Kuarentena no Bioseguransa, Servisu Migrasaun no Autoridade Aduaneira, Servisu Nasionál Intelijénsia, Diresaun Nasionál Seguransa Patrimóniu Públiku, no servisu autoridade ka administrasaun munisipál, responsável ba halibur, lori no soe lixu, sira-ne’ebé hola parte servisu autoridade ka administrasaun munisipál, servisu munisipál ba fornesimentu bee-moos, koveiru sira no sira-ne’ebé integra iha ekipa ne’ebé hala’o servisu iha RAEOA.
Jornalista : Arminda Fonseca
Editora : Julia Chatarina
