DILI, 03 janeiru 2022 (TATOLI)—Vise-Ministru Administrasaun Estatál (MAE), Lino de Jesus Torrezão, hateten nomeasaun ba administradór Munisípiu Ataúro ho nia adjuntu bele akontese iha fulan-janeiru tinan 2022 nia laran.
Notísia Relevante: MAE sei aprezenta kandidatu na’in-tolu ba kargu Prezidente Munisípiu Ataúro
Vise-Ministru ne’e informa, Governu nomea ona Ataúro-oan ne’ebé iha esperiénsia no iha kualidade ne’ebé hein lori ba Konsellu Ministru atu aprova, nune’e bele hala’o knaar hanesan Administradór munisípiu Ataúro nian.
“Ami nomea ona administradór Munisípiu Ataúro nian no nomeasaun ida-ne’e ami halo ba Ataúro-oan rasik tanba ami hakarak Ataúro oan mak tenke dezenvolve sira-nia rain rasik no tenke iha kapasidade. Ema ne’e mós iha esperiénsia antes durante iha Ministériu Administrasaun Estatál no mós iha Unidade Planeamentu Monitorizasaun no Avaliasaun (UPMA). Ema ne’ebé iha esperiénsia di’ak iha administrasaun públika,” Vise-Ministru ne’e ba Agência tatoli, liuhosi telefónika, segunda ne’e.
Nomesaun ne’e, agora iha ona faze preprativu ba levantamentu rekursu umanu Ataúro nian no sei halo rekrutamentu ba funsionáriu ema na’in-100, nune’e bele hatene ema Ataúro-oan na’in hira mak iha ne’ebá.
Bainhira ema la to’o karik, nia dehan, sei rekruta tan ema hosi munisípiu Dili bele sai hanesan funsionáriu iha rai Ataúro, tanba daudaun ne’e ekipa instaladora hala’o tiha ona.
Governante ne’e hateten. munisípiu Ataúro ne’e ekonómia eskluzivu ida no munisípiu espesiál, entaun munisípiu Ataúro atu hanesan Rejiaun Administrativa Espesiál Oé-cusse Ambeno (RAEOA).
Nia garante katak iha fulan-janeiru tinan 2022 nia-laran ne’e, administradór munisípiu Ataúro bele hala’o ona nia knar.
Notísia Relevante: PN aprova kria Fundu Espesiál Dezenvolvimentu ba Ataúro
Jornalista : Osória Marques
Editór : Cancio Ximenes
