DILI, 04 janeiru 2022 (TATOLI)— Governu liuhosi Ministériu Saúde (MS) hahú implementa vasina doze datoluk ba liña frente, idosu no ema ne’ebe vulneravel liu sira iha munisípiu Dili.
Diretora Servisu Saúde Munisípiu Dili Agostinha Segurado, hateten implementa vasina doze datoluk ba liña frente sira ho baze ba desizaun hosi Ministra Saúde.
“Vasina ne’e doze datoluk ne’e foku ba profisionál saúde no membru Governu balun ema ne’ebé mak hakarak atu simu vasina. Ita rekomenda mós uza vasina Pfizer ho razaun vasina ne’e uza ba loron lima nia laran de’it,” Diretora ne’e hateten hafoin lansa vasina doze datoluk uja salaun Palásiu Sinzas, Caicoli, tersa ne’e.
Tanba, Servsiu Saúde Munisípiu Dili hahú sura ona grupu alvu sira ne’ebé ho baze ba doze ne’ebé mak disponivél hela. Enkuantu liña Frente sira mak hanesan profisionál saúde, jornalista no idozu sira tanba stock vasina Pfizer sufisiente hamutuk doze 4.500-resin.
Iha biban hanesan, Eis Prezidente Repúblika, Jose Ramos Horta, ne’ebé sai ema dahuluk simu vasina doze datoluk ho tipu vasina Pfizer, hateten, simu vasina doze datoluk ne’e importante tebes atu hasa’e umunidade hodi prevene-an hosi moras COVID-19.
“Ohin, ha’u simu vasina doze datoluk hodi prevene-an hosi COVID-19. Tanba booster ne’e implementa ona iha Europeia hanesan Amérika no Austrália inklui nasaun balun hahú iha fulan abríl 2020. Tanba vasina sira ne’e to’o fulan-neen no hitu efeitu menus ona.” Ramos Hora afirma.
Hodi hatutan: “Entaun ba ha’u haree no estuda hodi fó hanoin ba Governu katak, oinsá ita bele uza tan booster ne’e hodi aumenta ita-nia imunidade hodi prevene moras ne’e iha ita-nia rain tanba COVID-19 ne’e seidauk hotu’’.
Nune’e, Eis Prezidente ne’e enkoraja sidadaun hotu ne’ebé simu ona vasina doze daruak no liu ona fulan-neen bele simu vasina doze datoluk hodi ajuda proteje ema ho umunidade forte hasoru COVID-19 no bele fasil halo viajen ba estrajeiru.
Notísia Relevante: COVID-19: kazu detetadu pozitivu tolu no ativu 11
Jornalista : Felicidade Ximenes
Editór : Florencio Miranda Ximenes
