VIQUEQUE, 04 janeiru 2022 (TATOLI)–Ministru Administrativu Estatál (MAE), Miguel Pereira de Carvalho, apresia ho inisiativa komunidade aldeia Baria, suku Uma-uain leten, postu Viqueque villa, muniaípiu Viqueque, ne’ebé konstrui rasik sede aldeia.
“Ha’u apresia tebes komunidade Baria, ne’ebé ho inisiativa rasik bele konstrui sede aldeia. Iha Timór laran ha’u seidauk haree komunidade iha inisiativa harii rasik harii sede aldeia, maibé, komunidade aldeia ne’e iha inisiativa di’ak,” Ministru hateten ba Agência TATOLI, hafoin ramata inaugura sede aldeia, iha suku Uma-uain leten, tersa ne’e.
Tuir Ministru, Timor-Leste iha suku hamutuk 452 no aldeia 2.230, maibé to’o ohin loron seidauk iha sede aldeia ida.
“Komunidade aldeia Baria hatudu katak bele halo dezenvolvimentu iha aldeia laran. Espera aldeia seluk bele halo tuir aldeia Baria ninia inisiativa, tanba hatudu ezemplu di’ak,” nia akresenta.
Iha fatin hanesan, Xefe aldeia Baria, Isac António Luter, haktuir, inisiativa harii sede aldeia mai hosi joven aldeia ne’e rasik.
“Ami hakarak harii sede aldeia, nune’e bainhira iha atividade bele halo iha sede laran, tanba durante ne’e ami laiha sede. Ho ida-ne’e maka ami tau hamutuk osan, kada uma-kain ida hatama osan $30, nune’e hosi uma-kain 75 bele halibur osan hamutuk $2.250, nune’e joven iha aldeia laran ne’e rasik mak voluntáriamente halo serbisu,” nia dehan.
Sede aldeia ne’e ho medida metru 8×6, kompostu hosi sala reuniaun ida, sala ba Xefe aldeia ida no sala administrasaun ida.
Iha biban hanesan, Xefe suku Uma-uain leten, Martinho S. Gusmão, rekoñese komunidade aldeia ne’e rasik maka iha inisiativa halibur osan hodi harii sede.
“Sira rasik tau hamutuk osan hodi sosa materiál no halo konstrusaun sede to’o hotu. Suku Uma-uain leten aldeia Ualu, maibé aldeia Baria de’it maka iha ona sede, seluk seidauk,” nia akresenta.
Seremónia ne’e partisipa hosi Administradór munisípiu Viqueque, Administradór postu Viqueque Villa, xefe suku sira no komunidade lokál.
Tuir dadus, populasaun aldeia Baria iha 339 hosi uma-kain hamutuk 75.
Jornalista : Vitorino Lopes da Costa
Editora : Julia Chatarina
